Дәстүрлі садақ атудан жастар чемпионаты: Астана құрамасы 10 медаль жеңді

Маңғыстау облысының Жаңаөзен қаласында жастар арасында дәстүрлі садақ атудан Қазақстан чемпионаты аяқталды. Астана спортшылары 10 медаль жеңіп, жалпы командалық есепте бірінші орын алды. Бұл туралы елорда әкімдігінің ресми сайты хабарлады.

Садақ ату чемпионатына қанша спортшы қатысты

Жарысқа еліміздің 11 өңірінен шамамен 60 жас спортшы келді. Олар «Жамбы», «Орта Азия», «Пута» және «Қалқан» нысаналары бойынша өзара бақ сынасты.

Төрт нысана бойынша өткен сайыста елордалық садақшылар 4 алтын, 3 күміс және 3 қола медаль жеңіп алды.

Астаналық садақшылар қандай медальдар жеңді

Жүлдегерлердің нәтижесі мынадай:

• Айкөркем Батихан «Жамбы» және «Орта Азия» нысаналарында жеңіп, екі дүркін чемпион атанды. Оған қоса «Қалқан» нысанасында күміс, «Пута» нысанасында қола медаль алып, жалпы төрт жүлде иеленді.
• Нуриддин Шаяхмет «Пута» нысанасында алтын медаль жеңді. «Қалқан» нысанасында күміс, «Орта Азия» нысанасында қола жүлдеге ие болды.
• Нұралла Орынбасаров «Орта Азия» нысанасында чемпион атанып, Астана құрамасына төртінші алтын медальді әкелді.
• Мерей Жұмабаева «Орта Азия» нысанасында күміс, «Қалқан» нысанасында қола медаль алды.

Командалық есепте қандай орындар бөлінді

Төрт алтын медаль жеңген Астана қаласы жалпы командалық есепте бірінші орынға шықты.

Екі алтын медаль алған Алматы құрамасы екінші орынды иеленді. Үздік үштікті бір алтын медальмен Маңғыстау облысының спортшылары түйіндеді.

Дереккөз: gov.kz