Қазақстанда ТЖМ 112 қызметі қалай жұмыс істейді: қоңыраудан көмек көрсетуге дейін

2024 жылдың басынан Қазақстан Төтенше жағдайлар министрлігінің 112 бірыңғай қызметіне 4 249 525 қоңырау тіркелді. Бұл қоңыраулардың 1 028 530-ы – анықтамалық сипаттағы сұраныстар, ал 1 356 209-ы – басқа да өтініштер мен балалар тарапынан жасалған жалған шақырулар.

Қоңырау қабылдау тәртібі

Әр шұғыл хабарламаға диспетчерлік қызмет оқиға туралы ақпарат жинаудан бастап, тиісті қызметтерге тапсырма беруге дейін толық жауапты. Қоңырау түскенде диспетчер оқиға орны, жағдайдың мән-жайы, зардап шеккендер туралы мәліметтерді нақтылайды. Егер нақты мекенжай белгісіз болса, елді мекен атауы, жол, жақын маңдағы ғимараттар сияқты белгілерді атау қажет. Қоңырау шалушыдан сабырлы болу, барлық сұраққа анық жауап беру сұралады.

Шақыруды бағалау және бөлімшелерді жіберу

Жиналған деректерге сүйене отырып, диспетчер оқиғаның сипатын анықтайды және қажетті қызметтерді жұмылдырады. Оқиға орнына өрт сөндірушілер, құтқарушылар, полиция, жедел жәрдем, авариялық газ қызметі және басқа да бөлімшелер жіберіледі. Кейде бірнеше қызмет қатар жұмыс істейді.

Қызметтердің өзара іс-қимылы және ақпарат алмасу

112 қызметі барлық жұмылдырылған қызметтердің үйлесімді жұмыс істеуін қамтамасыз етеді. Жағдайға байланысты ақпарат нақтыланып, қажет болса қосымша күштер тартылады. Диспетчерлер бөлімшелерден мәлімет алып, қажет болғанда қосымша ақпарат береді. Қауіп төнген жағдайда диспетчер қоңырау шалушыға қолдау көрсетіп, мамандар келгенге дейін қажетті нұсқаулар береді.

Көмек сұрағанда не істеу керек

Көмекті жылдам ұйымдастыру үшін оқиға орнын нақты хабарлау, диспетчердің сұрақтарына толық жауап беру және оның нұсқауларын орындау маңызды. Қосымша ақпарат берілгенге дейін байланыста болу ұсынылады.

Дереккөз: gov.kz