Өнеркәсіп қызметкерлері Республика күніне орай мемлекеттік наградалармен марапатталды

Астанадағы ҚР Өнеркәсіп және құрылыс министрлігінде Республика күні қарсаңында салтанатты жиын өтті. Мерекелік шарада министр Ерсайын Нағаспаев ел тәуелсіздігінің қалыптасуындағы тарихи құжаттардың маңызына тоқталды. Ол Мемлекеттік егемендік туралы декларацияның ел дамуы үшін ерекше рөл атқарғанын атап өтті.

Министр Ерсайын Нағаспаев өз сөзінде Қазақстан Президенті Қасым-Жомарт Тоқаевтың жетекшілігімен елде қуатты әрі бәсекеге қабілетті экономика құрылып жатқанын айтты. Сондай-ақ, жаңа Конституция қабылданып, мемлекеттік басқару жүйесінде маңызды өзгерістер орын алғанын, бұл реформалардың елдің тұрақты дамуына негіз қалап отырғанын жеткізді.

Өнеркәсіп пен құрылыс саласының рөлі

Салтанатты жиында өнеркәсіп пен құрылыс саласының экономиканы дамытудағы маңызы ерекше аталды. Министр инвестиция тарту, өңдеу секторын жетілдіру, құрылыс сапасын жақсарту және тұрғын үй-коммуналдық инфрақұрылымды жаңғырту негізгі бағыт екенін айтты. Сонымен қатар, цифрлық технологиялар мен жасанды интеллектіні енгізу де маңызды басымдықтардың бірі екені атап өтілді.

Мемлекеттік наградалар табысталды

Жиын соңында өнеркәсіп саласының үздік қызметкерлері және министрлік өкілдері мемлекеттік наградалармен марапатталды. Олардың арасында «Парасат», «Құрмет», III дәрежелі «Еңбек Даңқы» ордендері, «Ерен еңбегі үшін» медалі, сондай-ақ «Мемлекеттік қызмет ардагері» төсбелгісі табысталды. Марапат алғандардың қатарында слесарьлар, үңгілеушілер, бригадирлер, геолог-ғалымдар және басқа да қызметкерлер бар.

Дереккөз: gov.kz