Қазақстанда қандас мәртебесін алу тәртібі: негізгі кезеңдер

Қазақстанға көшуді жоспарлаған этникалық қазақтар алдымен қай өңірге қоныстанатынын анықтауы керек. Ел бойынша қоныс аударуға арналған жеті өңір белгіленген. Бұл кезеңде тұрмыс жағдайын және жұмыс табу мүмкіндігін бағалау маңызды.

ҚАЗТЕСТ және сауалнама толтыру

Келесі қадам – қазақ тілін білу деңгейін анықтайтын ҚАЗТЕСТ сынағынан өту. testcenter.kz сайтында өтетін бұл тестте тыңдалым мен оқылым бөліктерінен кемінде 70 пайыз дұрыс жауап беру қажет. Осыдан соң, үміткер білімі, жұмыс тәжірибесі, кәсіби дағдылары, тіл меңгеру деңгейі, денсаулық жағдайы мен отбасы құрамы туралы сауалнама толтырады. Бұл мәліметтер бойынша баллдық бағалау жүргізіледі.

Мемлекеттік тексеру және сұхбаттасу кезеңі

Сауалнама мен тест нәтижесі негізінде үміткердің деректерін арнайы және құқық қорғау органдары тексереді. Құжаттар расталған соң, өтініш берушімен сұхбат жүргізіліп, қандас мәртебесін беру туралы шешім қабылданады.

Қандас мәртебесін алу және мемлекеттік қолдау

Скоринг кезеңінен сәтті өткендер тиісті өтініш беріп, қандас мәртебесін алуға мүмкіндік алады. Өңірлік квотаға енгізілген жағдайда, қоныс аударуға, тұрғын үй жалдауға және коммуналдық қызметтерді төлеуге субсидиялар ұсынылады.

Бейімделу және тұрақты тұруды рәсімдеу

Мамандандырылған орталықтар құжаттарды рәсімдеуге, жұмысқа орналасуға және балаларды мектепке орналастыруға қолдау көрсетеді. Соңғы кезеңде Қазақстанда тұрақты тұруға рұқсат алып, тұруға ықтиярхат рәсімдей аласыз. Барлық қажетті құжаттарды алдын ала дайындап, талап етілетін кезеңдерден ретімен өту ұсынылады.

Дереккөз: gov.kz