Астанада сапасыз жөнделген ноутбук үшін тұтынушыға 480 мың теңге қайтарылды
Астана тұрғыны бағасы 480 мың теңге болатын ноутбук сатып алғаннан кейін құрылғыда ақау туындаған. Ноутбук үнемі қатып, өздігінен қайта жүктеле бастаған соң, иесі оны кепілдік жөндеуге сервистік орталыққа тапсырған.
Екі аптадан кейін тұтынушы ноутбукты қайта алғанда, бастапқы ақау жойылмағаны, ал корпусында жаңа механикалық зақым – бұрышында майысқан жер пайда болғаны анықталды. Сондай-ақ, сервистік орталық қызметкерлері құрылғыны қабылдағанда оның сыртқы жағдайын толық сипаттайтын құжат ұсынбаған.
Тұтынушы шағымы жауапсыз қалды
Сатып алушы ноутбукты жөндеу және зақымдарды жою туралы сатушыға жазбаша шағым жолдаған. Алайда оның өтініші қараусыз қалған.
Дауды өздігінен шеше алмаған соң, тұтынушы Астана қаласы бойынша Сауда және тұтынушылардың құқықтарын қорғау департаментіне жүгінді. Департамент мамандары құқықтық түсіндіру жұмыстарын жүргізіп, нәтижесінде дау сотқа жетпей шешілді.
Ноутбуктың толық құны қайтарылды
Келісім бойынша тұтынушыға ноутбуктың толық құны – 480 000 теңге қайтарылды.
Департамент өкілдері техниканы жөндеуге тапсырғанда құрылғының сыртқы жағдайы көрсетілген қабылдау-тапсыру актісін талап етудің маңызын еске салды. Бұл даулы жағдайда тұтынушы құқығын қорғауға мүмкіндік береді.
Кепілдік жөндеу кезіндегі құқықтар
Мамандар бұл оқиға кепілдік жөндеу қызметі кезінде тұтынушылардың құқықтарын сақтау және шағымдарды уақытылы қараудың маңызын көрсететінін айтады.
Дереккөз: gov.kz
