Алматы-1 вокзалын жаңғырту аяқталуға жақын: ғимарат ауданы 17 мың шаршы метрден асады
Алматы-1 вокзалында ғимаратты және оған іргелес аумақты жаңарту жұмыстары аяқталу сатысында. Вокзал кеңістігі жолаушылардың қажеттілігіне сай өзгеруде: күту аймақтары кеңейіп, қауіпсіз әрі ыңғайлы жағдай жасалуда.
Жаңартылған вокзал ғимаратында не өзгерді
Жаңартылған ғимараттың ауданы 17 мың шаршы метрден асады. Ішкі кеңістікті ұйымдастыру қайта қаралып, күту залы үлкейтілді. Ғимаратта заманауи инженерлік жабдықтар орнатылған.
- Жаңа эскалаторлар мен лифттер орнатылды.
- Ақпараттық таблолар қойылды.
- Ерекше қажеттілігі бар жолаушыларға нысанды еркін пайдалануға жағдай жасалуда.
- Ғимараттың төменгі бөлігінде коммерциялық нүктелер орналасады.
- Жолаушыларға арналған модульдік қонақ бөлмелері қарастырылған.
- Теміржол мұражайы ашылады.
Конкорстың конструкциясы күшейтіліп, онда әйнек элементтері қолданылады. Шатыр мен қасбет жаңартылып, ішкі әрлеу жұмыстары жүргізілуде. Ғимаратта заманауи материалдар қолданылған.
Вокзал алдындағы аумақ қалай өзгереді
Вокзал алдындағы тұрақ аймағының орнына абаттандырылған аллея жасалады. Онда ағаштар мен гүлзарлар болады, орындықтар мен демалыс орындары пайда болып, ақпараттық тақта орнатылады.
Аумақ вокзалдың жолаушылар кеңістігінің жалғасы, сондай-ақ ыңғайлы қалалық аймақ болмақ.
Нысанда қанша адам жұмыс істеп жатыр
Құрылыс жұмыстары тәулік бойы жүргізілуде. Күндізгі ауысымға 407 адам, түнгі ауысымға 68 адам жұмылдырылған. Нысанда арнайы техника да жұмыс істеп тұр.
Дереккөз: gov.kz
