«Дарын» мемлекеттік жастар сыйлығының 20 үміткері финалға шықты
«Дарын» мемлекеттік жастар сыйлығын беру жөніндегі конкурстық комиссияның қорытынды отырысы өтті. Оған Қазақстан Республикасының Мәдениет және ақпарат министрі Арман Қырықбаев қатысты.
Биыл сыйлыққа 504 өтінім түскен. Оның ішінде алдын ала тексеруден өткен 429 өтінім комиссия қарауына жіберілді. Іріктеу он аталым бойынша жүргізілді. Ең көп өтінім «Ғылым» (119) және «Қоғамдық қызмет» (75) бағыттарында тіркелді. Сонымен қатар «Театр және кино» (58), «Халық шығармашылығы» (43), «Классикалық музыка» (30), «Әдебиет» (23), «Эстрада» және «Дизайн және бейнелеу өнері» (әрқайсысы 22), «Спорт» (20), «Журналистика» (17) аталымдары бойынша өтінімдер қабылданды.
Конкурстық комиссия құрамына Құрылтай депутаттары, орталық мемлекеттік органдар өкілдері, ғалымдар, мәдениет және өнер қайраткерлері, қоғам белсенділері, Президент жанындағы Жастар саясаты жөніндегі кеңес мүшелері, кәсіпкерлер және Президенттік жастар кадр резервінің өкілдері кірді.
Іріктеу кезеңдері және финалистер
Үміткерлер екі кезеңде іріктелді. 27-29 қазан аралығында алты бағыт бойынша секциялық отырыстар өтті. Осы отырыстардың қорытындысы негізінде комиссияның соңғы отырысына ұсыныстар берілді.
Биыл он номинацияның әрқайсысы бойынша екі адамнан, жалпы 20 үміткер финалға шықты. Мәдениет және ақпарат министрі Арман Қырықбаев комиссия мүшелеріне жұмыстары үшін алғыс айтты. Ол үміткерлерді әділ және жан-жақты бағалаудың, таланты жастарды қолдаудың маңызын атап өтті.
«Дарын» сыйлығы туралы мәлімет
«Дарын» мемлекеттік жастар сыйлығы 1992 жылдан бері ғылым, шығармашылық, қоғамдық қызмет пен спорт саласында жетістікке жеткен жастарды қолдау мақсатында беріліп келеді. Осы уақытқа дейін 400-ге жуық адам бұл марапатты иеленді. Биылғы жеңімпаздарды марапаттау рәсімі 26 қарашада өтеді.
Дереккөз: gov.kz
