COP31: Қазақстан халықаралық және өңірлік экологиялық ынтымақтастықты күшейтіп жатыр
Анталияда өтіп жатқан БҰҰ Климаттың өзгеруі туралы негіздемелік конвенциясы тараптарының 31-конференциясының (COP31) бесінші күні халықаралық және өңірлік ынтымақтастық мәселелеріне арналды. Қазақстан делегациясы жоғары деңгейдегі шараларға қатысып, экология және климат саласының өзекті тақырыптарын талқылады.
Орталық Азиядағы өңірлік экологиялық әріптестік
Қазақстанның Экология және табиғи ресурстар министрі Әлібек Қуантыров Қырғыз Республикасының ұлттық павильонында өткен ЕҚЫҰ және Орталық Азия елдері министрлерінің кездесуіне қатысты. Ол аймақтағы мемлекеттердің экологиялық мәселелер бойынша бірлескен жұмысының маңызын атап өтті. Әсіресе, 2026 жылы Астанада өтетін Өңірлік экологиялық саммит пен Алматыда биыл өткен RECCIS-CA жұмыс тобының екінші отырысының нәтижелеріне тоқталды.
Климаттың өзгеруіне бейімделу және мұздықтарды сақтау шаралары
Тәжікстан павильонында өткен «Су және азық-түлік қауіпсіздігін қамтамасыз ету мақсатында мұздықтарға байланысты тәуекелдерді басқару» тақырыбындағы жоғары деңгейдегі диалогқа да Қазақстан қатысып, өз тәжірибесімен бөлісті. Әлібек Қуантыров елімізде климаттың өзгеруіне бейімделуді күшейтуге арналған мемлекеттік шаралар жүйелі түрде жүргізіліп жатқанын айтты. Қазіргі таңда Ұлттық бейімделу жоспары әзірленуде, жаңа Су кодексі қабылданды және су үнемдеу технологиялары енгізілуде. Сондай-ақ Алматыдағы ЮНЕСКО қамқорлығындағы Орталық Азия өңірлік гляциологиялық орталығы жұмысының маңызы атап өтілді.
Білім беру мен инновацияны дамыту
Министр COP31 аясында өткен «Оқу кампустарынан климаттық шешімдерге дейін: білім беру, инновациялар және әріптестік арқылы климаттың өзгеруіне төзімділікті арттыру» атты іс-шараға қатысты. Бұл кездесуді ИСЕСКО мен Пәкістан Үкіметі ұйымдастырды. Қазақстанның конференцияға белсенді қатысуы елдің халықаралық және өңірлік ынтымақтастықты нығайтуға, климаттық сын-қатерлерге қарсы нақты шешімдерді ілгерілетуге және экологиялық мәселелерді бірлесе шешуге дайын екенін көрсетеді.
Дереккөз: gov.kz
