Әлеуметтік аударымдарды тексеру тәртібі: Еңбек министрлігі түсіндірді

ҚР Еңбек және халықты әлеуметтік қорғау министрлігі азаматтарға жұмыс берушінің Мемлекеттік әлеуметтік сақтандыру қорына (МӘСҚ) әлеуметтік аударымдарды аударып отырғанын өз бетінше тексеруге болатынын ескертті. Бұл ақпаратты eGov.kz порталы, кейбір банктердің мобильді қосымшалары, сондай-ақ Халыққа қызмет көрсету орталығы немесе МӘСҚ филиалы арқылы алуға болады.

Әлеуметтік аударымдардың маңызы және мөлшері

Әлеуметтік аударымдардың толық әрі уақтылы төленуі жұмыс істейтін азаматтардың әлеуметтік қорғалуында шешуші рөл атқарады. Бұл аударымдар адамның табысы мен әлеуметтік сақтандыру жүйесіне қатысу ұзақтығына қарай есептеледі және тиісті төлемдерді алу құқығын анықтауға қажет.

Әдетте, жұмыс берушілер әлеуметтік аударымдарды өз қаражаты есебінен төлейді, олар жұмыскердің жалақысынан ұсталып қалмайды. Заңнамаға сай, аударым мөлшері – есептелетін табыстың 5 пайызын құрайды. Әлеуметтік аударымдар әр ай сайын, есепті айдан кейінгі айдың 25-іне дейін төленуі тиіс.

Міндетті әлеуметтік сақтандыру жүйесінің мүмкіндіктері

Міндетті әлеуметтік сақтандыру жүйесі бірнеше әлеуметтік жағдайларда төлем алуды қарастырады. Оларға еңбекке қабілеттіліктен, жұмыстан айырылу, жүктілік пен босану, бала асырап алу, бала күтіміне байланысты табыстан айырылу жатады. Жүйеге қатысушы қайтыс болған жағдайда, заң талаптарына сәйкес асырауындағы отбасы мүшелері әлеуметтік төлем ала алады.

Төлем мөлшері әлеуметтік тәуекелдің түріне, аударым жүргізілген табысқа және жүйеге қатысу ұзақтығына қарай анықталады.

Әлеуметтік аударымдарды тексеру жолдары

Азаматтар eGov.kz порталындағы «Міндетті әлеуметтік сақтандыру жүйесіне қатысушыға әлеуметтік аударымдардың жағдайы мен қозғалысы туралы ақпарат беру» қызметі арқылы аударымдарды тексере алады. Ол үшін қажетті кезеңді таңдап, электрондық сұрау жіберу керек. Нәтижені жеке кабинеттен көруге болады.

Сондай-ақ, мәліметтерді кейбір банктердің мобильді қосымшаларынан немесе ХҚКО мен МӘСҚ филиалынан алуға мүмкіндік бар. Бұл үшін жеке куәлік қажет. Мұндай тексеру аударылған сома мен кезеңдерді нақтылауға көмектеседі.

Аударымдарда сәйкессіздік анықталса не істеу керек

Егер жекелеген айлар бойынша аударымдар түспесе немесе сомасына қатысты сұрақтар туындаса, алдымен жұмыс берушіге немесе бухгалтерияға жүгіну керек. Егер жұмыс беруші міндеттемелерін орындамаса, мемлекеттік кірістер органдарына өтініш беруге болады.

Әлеуметтік төлемдер туралы кеңесті МӘСҚ филиалдарынан немесе 1414 байланыс орталығынан алуға болады. Аударымдарды тұрақты тексеру олардың уақытында түспеуін немесе деректердегі сәйкессіздіктерді ерте анықтауға және қажетті шаралар қабылдауға мүмкіндік береді.

Дереккөз: gov.kz