Астанада үздік полицейлер мен спортта топ жарған қызметкерлер марапатталды
Астана қаласының полиция департаментінде қызметтік міндетін адал орындап, жоғары нәтижелерге қол жеткізген, сондай-ақ республикалық және халықаралық спорттық жарыстарда үздік көрсеткіш көрсеткен қызметкерлерді марапаттау рәсімі өтті.
Салтанатты шарада департамент бастығы Марат Төлебаев қызметкерлерге мемлекеттік және ведомстволық наградаларды табыстады. Ерлік, жанқиярлық, кәсібилік және қоғамдық тәртіпті қамтамасыз етуге қосқан үлесі үшін бірқатар полиция қызметкері атап өтілді. Марапатталғандар арасында патрульдік полиция полкінің қызметкері Нұрғиса Бектасов та бар. Ол Ғазиз Байтасов атындағы медальге ие болды.
Полицейлердің спорттағы жетістіктері
Салтанатты рәсімде полиция қызметкерлерінің спорттағы жетістіктері де ерекше аталды. Олар түрлі деңгейдегі жарыстарда департамент абыройын қорғап жүр. Атап айтқанда, департамент бастығының көмекшісі Мұрат Исмағамбетов Түркияда өткен қоян-қолтық ұрыстан әлем кубогында үшінші орын алды. Жылдам қимылдайтын арнайы жасақ инспекторы Арай Мусина Таразда өткен Қазақстан чемпионатында кикбоксингтен бірінші орынға қол жеткізді. Ал ЖҚАЖ аға инспекторы Дархан Жексембинов Қонаевта өткен практикалық атыс бойынша Қазақстан чемпионатында командалық есепте жеңіске жетті.
Павлодарда өткен ІІМ чемпионатында да елордалық полицейлер жүлделі орын иеленді. Бұл жеңістер – табанды дайындық пен тәртіптің, қайсар мінездің жемісі. Спорттағы жетістіктердің артында күнделікті жаттығу мен қажырлы еңбек тұрса, қызметтік марапаттардың негізінде жауапкершілік пен мамандығына адалдық жатыр.
Полиция басшылығының құттықтауы
Шара соңында департамент басшылығы марапат иелерін құттықтап, қызметкерлердің кәсіби біліктілігін арттыру мен дәстүрді нығайтудың маңызын атап өтті. Жоғары нәтижеге жету мен азаматтарды қорғау – астаналық полицейлерді қызметте де, спортта да біріктіретін ортақ құндылық екені айтылды.
Дереккөз: gov.kz
