Қазақстанда нефрологиялық орталықтар көбейеді және диализ сапасына бақылау күшейеді
Денсаулық сақтау министрі Ақмарал Әлназарова жыл соңына дейін еліміздің барлық өңірінде нефрология саласы бойынша құзыреттілік орталықтарын ашуды тапсырды. Бұл туралы Алматыда өткен министрліктің алқа мәжілісінде айтылды. Сондай-ақ, диализ көмегінің сапасын жақсарту мен оны қаржыландыру жүйесін жетілдіру қажеттігі көтерілді.
Нефрологиялық көмек қолжетімді болмақ
Министр бүйрек ауруларын ерте анықтау мен емханалар және өңірлік медициналық ұйымдарда нефрологиялық көмекті қолжетімді етуге ерекше назар аударды. Қазір Қазақстанда созылмалы бүйрек дертімен диспансерлік есепте тұрғандар саны 40 мыңнан асты. Ал алғаш рет анықталған әр үшінші науқас дәрігерге аурудың соңғы сатысында ғана келеді. Бұл кезде бүйрек қызметін алмастыратын ем қажет болады.
Қаржыландыру көлемі жыл сайын 10-12% өсіп келеді. Министрдің айтуынша, дер кезінде анықтап, ем жүргізілсе, науқастардың бір бөлігінің бүйрегін сақтауға мүмкіндік бар. Осыған байланысты емханадан бастап мамандандырылған орталықтарға дейінгі қызметті жүйелі түрде ұйымдастыру керектігі айтылды.
Зертханалық диагностика және дерек нақтылығы
Министрліктің мәліметіне сәйкес, қосымша зертханалық зерттеулер енгізудің арқасында созылмалы бүйрек ауруын анықтау көрсеткіші 2025 жылы 26 мыңнан 2026 жылдың тоғыз айында 40 мыңнан астамға өскен. Қазіргі уақытта нефрология орталықтары тоғыз өңірде бар. 2026 жылдың соңына дейін барлық өңірде орталықтар ашылмақ.
Алқа мәжілісінде гемодиализ көмегінің сапасын бақылау мен медициналық деректердің дұрыстығын қамтамасыз ету мәселелері қаралды. Ақпараттық жүйелерді талдау кезінде кейбір сәйкессіздіктер анықталған: 6 400 науқастың деректерін тексеру кезінде соңғы гемодиализ күні мен қайтыс болу күні қатар келген жағдайлар анықталды. Министр профильді комитетке осы деректерді қосымша тексеруді тапсырды.
Диализ орталықтарын бағалау және қаржыландыруды жетілдіру
Барлық меншік түріндегі диализ орталықтарының қызметіне кешенді бағалау жүргізіледі. Бұл ретте медициналық көмектің сапасы, қауіпсіздігі және үздіксіздігі басты назарда болады. Сонымен бірге, министрлік гемодиализді қаржыландыру тәсілдерін ем нәтижелері мен сапасына қарай жетілдіруді жоспарлап отыр.
Трансплантация және кадрлық әлеует
Бүйрек трансплантациясын дамыту, әсіресе балаларға жасалатын операцияларды жетілдіру маңызды бағыт ретінде белгіленді. Қазіргі таңда 4 200-ден астам қазақстандық бүйрек трансплантациясын күтіп отыр. Министр балаларды шетелде трансплантацияға жіберу талаптарын қайта қарауды және осы бағытта қаржылық есептеулерді дайындауды тапсырды.
Жиын қорытындысы бойынша бүйрек ауруларын ерте диагностикалау, нефрологиялық қызметті кадрлық тұрғыдан күшейту, амбулаториялық орталықтарды дамыту, диализ сапасын бақылау және трансплантациядан кейінгі пациенттерді қадағалау шаралары тапсырылды. Сонымен қоса, арнайы оқытылған орта буын медицина қызметкерлерін гемодиализге кеңінен тарту жоспарланып отыр.
Бұл шаралардың негізгі мақсаты – бүйрек ауруларын ерте анықтау, асқыну қауіпін азайту және барлық қазақстандықтарға сапалы, қолжетімді нефрологиялық көмек ұсыну.
Дереккөз: gov.kz
