Шанхай сарапшылары Қазақстанды өңірлік маңызды ел ретінде мойындады
Қазақстанның Шанхайдағы Бас консулдығы Республика күніне орай «Қазақстан Тәуелсіздігіне 35 жыл: мемлекеттік даму қорытындылары және қазақ-қытай ынтымақтастығының жаңа көкжиектері» атты дөңгелек үстел ұйымдастырды. Бұл жиынға Шанхай қаласы мен Чжэцзян провинциясының жетекші сараптамалық орталықтары, ғылыми мекемелері, жоғары оқу орындары өкілдері, қазақстандық магистранттар мен докторанттар, сонымен қатар онлайн форматта Қазақстан стратегиялық зерттеулер институты мен ҚР СІМ Сыртқы саяси зерттеулер институтының сарапшылары қатысты.
Қазақстанның жетістіктері мен халықаралық рөлі
Бас консул Нұрлан Аққошқаров Қазақстанның мемлекеттік басқару, экономика және халықаралық беделін арттыру саласындағы жетістіктеріне тоқталды. Ол қазақ-қытай қатынастарының көпжақты әрі стратегиялық сипатта дамып келе жатқанын атап өтті.
Қытай сарапшыларының бағасы
Қытайлық сарапшылар Қазақстандағы саяси және әлеуметтік-экономикалық жаңаруларды жоғары бағалады. Олар Қазақстанды өңірлік қауіпсіздік пен тұрақтылықты қамтамасыз ететін Еуразиядағы басты байланыстырушы деп сипаттады.
Ынтымақтастықтың жаңа бағыттары
Дөңгелек үстелде цифрлық технологиялар, жасанды интеллект, бірлескен өндіріс, кадр даярлау және ғылыми зерттеулер салаларында ынтымақтастықты кеңейту мәселелері қаралды. Сарапшылар Транскаспий халықаралық көлік бағытының Қытай мен Еуропа арасындағы стратегиялық рөлін ерекше атап өтті және оның «Бір белдеу, бір жол» бастамасымен байланысына тоқталды.
Екі ел қарым-қатынасындағы жаңа кезең
Қытайлық ғалымдар Қазақстан мен Қытай арасындағы ынтымақтастықтың жаңа «алтын отыз жылдығы» басталғанын айтты. Олардың пікірінше, бұл кезең өзара сенім мен өңірлік тұрақтылықты одан әрі нығайтуға жол ашады.
Дереккөз: gov.kz
