Астанада авиациялық қауіпсіздік бойынша халықаралық ынтымақтастық талқыланды
Астанада Халықаралық азаматтық авиация ұйымының (ИКАО) Авиациялық қауіпсіздік апталығы – ICAO Security Week 2026 аясында жоғары деңгейдегі баяндамалар сессиясы өтті. Басқосуда халықаралық ынтымақтастықты күшейту, мемлекеттік қадағалау жүйесін жетілдіру және азаматтық авиацияны қорғауда заманауи технологияларды қолдану мәселелері қарастырылды.
Сессияда қандай тақырыптар қозғалды
Сессияға Канаданың Көлік министрінің қауіпсіздік және қорғау жөніндегі орынбасарының көмекшісі Лиза Дж. Сетлакве, Ресей Федерациясының Көлік саласындағы қадағалау қызметінің басшысы Виктор Гулин, Африка азаматтық авиация комиссиясының (AFCAC) бас хатшысы АдеСева Адейеми және Латын Америкасы азаматтық авиация комиссиясының (LACAC) бас хатшысы Хайме Биндер қатысты.
Лиза Сетлакве геосаяси шиеленіс, қарулы қақтығыстар мен киберқауіптер жағдайында мемлекеттердің бірлескен әрекет етуі қажеттігін айтты. Ол қауіп-қатерлер туралы ақпарат алмасудың, халықаралық стандарттарды әзірлеуде ИКАО-ның рөлін және Канаданың Safer Skies бастамасын ерекше атап өтті.
Мемлекеттік қадағалау мен заманауи қауіпсіздік шаралары
Виктор Гулин мемлекеттік қадағалау жүйесін жетілдіру, заңбұзушылықтардың алдын алу және терроризмге қарсы іс-қимыл тәсілдері туралы баяндады. Ол ұлттық қадағалау жүйелерінің ИКАО-ның әмбебап аудит бағдарламасымен өзара іс-қимылы, авиация ұйымдарының өзін-өзі бағалау тетіктері және жасанды интеллектіні пайдалану арқылы туындайтын киберқауіптер туралы айтты.
АдеСева Адейеми AFCAC-тың африкалық елдерге ИКАО аудиттеріне дайындалу және түзету шараларын жүзеге асыру кезіндегі қолдауын сипаттады. Ол қауіпсіздік пен рәсімдерді жеңілдетуде цифрландырудың рөліне назар аударды. Оның айтуынша, цифрлық құралдар мемлекеттерге жолаушыларды анықтауды және шекаралық бақылау рәсімдерін жеңілдетуді қамтамасыз етеді.
Өңірлік ынтымақтастық пен ортақ жауапкершілік
Хайме Биндер Латын Америкасы мен Кариб елдерінің ИКАО және LACAC аясында бірлескен өңірлік топ құрып, жүк тасымалының қауіпсіздігі, киберқауіпсіздік, тәуекелдерді бағалау және персоналды даярлау саласында тәжірибе алмасатынын жеткізді. Ол халықаралық авиациядағы қауіпсіздік – ортақ жауапкершілік екенін атап өтті.
Сессия соңында қатысушылар ақпарат пен тәжірибе алмасудың, кадрлық әлеуетті дамытудың және ИКАО стандарттарын жүйелі енгізудің маңыздылығына тоқталды. Мемлекеттер мен ұйым өкілдері іс-шараны жоғары деңгейде өткізген Қазақстан мен ИКАО-ға алғыс білдірді.
Дереккөз: gov.kz
