Қазгидромет Орталық Азия елдерімен климаттық ынтымақтастықты кеңейтті

2026 жылғы 9 қарашада Түркияда БҰҰ-ның Климаттың өзгеруі жөніндегі негіздемелік конвенциясы тараптарының 31-конференциясы (COP31) аясында «Қазгидромет» РМК мен Орталық Азияның Өңірлік экологиялық орталығы (ОАӨЭО) ынтымақтастық туралы меморандумға қол қойды.

Құжатқа «Қазгидромет» РМК бас директоры Данара Алимбаева мен ОАӨЭО атқарушы директоры Батыр Мамедов қол қойды. Меморандумның мақсаты – Орталық Азия елдері арасында климаттың өзгеруі мәселелері бойынша ынтымақтастықты нығайту, климаттық қызметтерді жетілдіру және шешім қабылдау үшін ақпарат сапасын арттыру.

Климаттық деректер мен сараптамалық қолдау

Қазақстан үшін бұл келісім гидрометеорологиялық және климаттық деректер алмасуды, халықаралық сарапшыларды тартуды, мамандарды оқытуды және бірлескен өңірлік жобаларға қатысу мүмкіндіктерін арттырады.

Атап айтқанда, тараптар қауіпті табиғи құбылыстарды бақылау және ерте ескерту жүйелерін жетілдіру, климаттық тәуекелдерді бағалау, сондай-ақ климаттың өзгеруінің су ресурстарына, мұздықтарға, ауыл шаруашылығына және басқа да осал салаларға әсерін зерттеу бағытында бірлесіп жұмыс істейді.

Өңірлік тұрақтылықты арттырудағы қадам

Меморандумға қол қою Орталық Азия елдерінің климат саласындағы өзара әрекетін нығайтуға және өңірдің климаттық тұрақтылығын арттыруға бағытталған маңызды қадам саналады.

Дереккөз: gov.kz