Автобуста балалар арбасымен жүруге шектеу жоқ – ресми ақпарат
Астана қаласының әкімдігі Қазақстан Республикасы Көлік министрлігінің түсіндірмесіне сүйене отырып, ата-аналардың балалар арбасымен қоғамдық көлікте жүруіне тыйым салынбағанын мәлімдеді. Әлеуметтік желілерде тараған шектеулер туралы ақпарат шындыққа жанаспайды.
Қолданыстағы талаптар қандай?
Автомобиль көлігімен жолаушылар мен багажды тасымалдау қағидаларына енгізілген өзгерістерге сәйкес, автобус салонында орын жеткілікті болған жағдайда балалар арбасын жинаулы күйде алып өту ұсынылады. Бұл кезде арба жолаушылардың қозғалысына бөгет жасамауы керек.
Жаңа ереже кімнің қауіпсіздігі үшін енгізілді?
Бірқатар талаптар, оның ішінде арбаны жинап тасу талабы, жолаушылар мен балалардың қауіпсіздігін қамтамасыз ету, сондай-ақ автобустағы қозғалысты еркін ету мақсатында енгізілген. Егер ата-ана арбаны жинау мүмкіндігі болмаса, сапарын арба жайылған күйінде жалғастыра алады.
Айыппұл немесе басқа шаралар бар ма?
Ата-аналарға арбамен қоғамдық көлікте жүргені үшін айыппұл салу, автобустан түсіру немесе басқа санкциялар қарастырылмаған.
Дереккөз: gov.kz
