Түркістан облысында сел мен көшкінге қарсы жаңа бақылау пункті іске қосылды
Төтенше жағдайлар министрі Мұрат Мұханов Түркістан облысы Қазығұрт ауданында «Қазселденқорғау» мекемесінің жаңа диспетчерлік пунктін ашты. Бұл орталықта табиғи қауіп-қатерлерге тәулік бойы мониторинг жасалады.
Ауданда сел, көшкін және қар көшкіні қаупі бар 34 аймақ анықталған. Бұл жерлерде 426 нысан орналасқан, 1 500-ден астам адам тұрады. Қазығұртта 19 сел, 14 көшкін және 1 қар көшкіні қаупі бар аймақ тіркелген.
Сел мен көшкін қаупі бар аумақтар қалай бақыланады
«Қазселденқорғау» мамандары Жігергенсай және Өгем өзендеріндегі гидрологиялық жағдайды қадағалайды. Бұл өзендерде екі тұрақты бақылау бекеті жұмыс істейді. Деректер тәулігіне үш рет, жағдай күрделенсе әр екі сағат сайын жіберіледі. Жиналған ақпарат қауіп-қатерді дер кезінде анықтап, халықты қорғау шараларын жүргізуге мүмкіндік береді.
Жаңа пункттің мүмкіндіктері мен қаржыландыруы
Диспетчерлік пункт үшін жалпы ауданы 34 шаршы метрлік бір қабатты модульдік ғимарат салынды. Мұнда диспетчерлік бөлме, әкімшілік кабинеттер, ас үй және санитарлық торап бар. Қызметкерлерге тәулік бойы кезекшілік жасауға барлық жағдай жасалған. Аумағы қоршалып, инженерлік жұмыстар атқарылды. Құрылыс үш аптадан аз уақытта аяқталды. Жоба Қазақстан құтқарушылар қорының бюджеттен тыс қаражаты есебінен қаржыландырылды.
Тұрақты бақылау және алдын алу шаралары
Жаңа пункт Қазығұрттағы қауіпті табиғи процестерді тұрақты бақылауға мүмкіндік береді. Төтенше жағдайлар министрлігі сел, көшкін және өзге табиғи қауіптердің алдын алу, тәуекелдерді уақтылы анықтау және халықты ескерту мақсатында «Қазселденқорғау» мекемесінің бақылау нысандары желісін дамытуды жалғастырып жатыр.
