Астанада 2029 жылға дейін 100-ден аса жаңа өндіріс орны ашылады
Астанада өнеркәсіп өндірісі өсіп, жаңа зауыттар мен фабрикалар ашылуда. 2026 жылдың тоғыз айында қала кәсіпорындары 3,1 триллион теңгенің өнімін шығарды. Бұл өткен жылмен салыстырғанда 11,6 пайызға артық көрсеткіш.
Өнеркәсіптің негізгі бөлігі – 94,9 пайызы өңдеу секторына тиесілі. Басты салалар қатарында металлургия, машина жасау, құрылыс материалдары мен азық-түлік өндірісі бар.
Индустриялық парктер мен инвестиция
Елордадағы ірі өнеркәсіп аймақтарының бірі – №1 Индустриялық парк. Мұнда 145 жоба іске асырылуда: 103 кәсіпорын жұмыс істеп тұр, ал 42 жоба іске қосылу кезеңінде. 30-дан аса өндіріс орны шетелдік инвестицияның көмегімен құрылып жатыр.
Астанада арнайы экономикалық аймақтардағы кәсіпорындар 7 мыңнан астам адамды жұмыспен қамтып отыр. Жаңа жобалар арқылы тағы 2,5 мыңға жуық жұмыс орны ашылмақ.
№2 Индустриялық парктің дамуы
Қалада №2 Индустриялық паркті құру жобасы жүзеге асырылып жатыр. 2029 жылға дейін бұл аймақта 100-ден аса жаңа өндіріс орны орналастырылады деп күтілуде. Осы жобалардың нәтижесінде 8 мыңнан астам жаңа жұмыс орны пайда болады.
Шағын және орта бизнеске қолдау
Елордада үш шағын өнеркәсіптік аймақ жобасы іске асырылған. Кәсіпкерлерге 20 мың шаршы метрден астам өндірістік әрі қойма ғимараттары берілді.
Агроөнеркәсіптік аймақ пен жаңа жобалар
Байқоңыр ауданындағы Өндіріс тұрғын алабында жалпы аумағы 87,8 гектарды қамтитын Агроөнеркәсіптік аймақ құру жоспарланып отыр. Мұнда азық-түлік өндірісіне бағытталған 20-дан аса жоба жүзеге асады.
Жаңа өндірістік алаңдарды дамыту арқылы Астанада өндіріс көлемі ұлғайып, қосымша инвестиция мен мыңдаған жаңа жұмыс орны ашылады.
Дереккөз: gov.kz
