Алматы облысында 19,3 млрд теңгеге екі ірі агрожоба іске асырылып жатыр
Алматы облысында ауыл шаруашылығы саласын дамыту мақсатында екі ірі инвестициялық жоба қолға алынды. Бұл жобалардың жалпы құны 19,3 млрд теңгені құрайды. Аталған бастамалар көкөніс өндірісін арттыруға және өңірдегі ауыл шаруашылығы өнімдерін сақтау мен тасымалдау инфрақұрылымын жетілдіруге бағытталған.
ALATAU GREEN PRODUCTION жылыжай кешені
Ірі жобалардың бірі – құны 17,3 млрд теңге болатын ALATAU GREEN PRODUCTION заманауи жылыжай кешенінің құрылысы. Бұл кешен жылына 4 мың тоннаға дейін көкөніс өндіре алады. Жоба 16 гектар аумақта жүзеге асырылуда, оның ішінде әрқайсысы 4 гектар болатын қысқы және жазғы жылыжайлар, сондай-ақ көшет өсіруге және салат өнімдерін өндіруге арналған арнайы бөлімшелер бар.
Кешен аумағында 9 177 шаршы метрлік қойма ғимараты салынады. Бұл қойма 6 мың тонна көкөністі ұзақ мерзімге және 720 тонна жеміс-жидекті қысқа мерзімге сақтауға мүмкіндік береді. Қазіргі уақытта құрылыс жұмыстарының 80 пайызы аяқталды, ал кешенді келесі жылы іске қосу жоспарланған.
Астық логистикасын дамытуға арналған жоба
Екінші жоба – құны 2 млрд теңге болатын өндірістік-логистикалық кешеннің құрылысы. Бұл жоба «Қайрат» индустриялық аймағында жүзеге асырылып жатыр. Мұнда «СТРОЙИНВЕСТ – TS» компаниясы астық өнімдерін қабылдау, сақтау және тасымалдауға арналған көпфункционалды кешен салуда.
18,45 гектар жерге жалпы сыйымдылығы 10 мың тонна болатын астық қоймалары салынады. Кешен жылына 200 мың тоннаға дейін астық жөнелте алады. Теміржол инфрақұрылымы толық аяқталған, ал газ желілерін тарту жұмыстары соңғы сатыда. Негізгі құрылыс-монтаж жұмыстары да аяқталуға жақын.
Дереккөз: gov.kz
