60 мың камера, 35 AI-сценарий: Астанада қауіпсіздік қалай цифрландыруда

Астанада Цифрландыру және жасанды интеллект жылы шеңберінде қала жүйелі түрде цифрландырылып жатыр. Елордада қауіпсіздікті күшейту мақсатында Astana Smart City жобасының негізгі элементтері — Деректерді өңдеу орталығы мен Қалалық ахуалдық орталық — іске қосылды, деп хабарланды елордалық Коммуникациялар қызметінде өткен брифингте.

Деректер орталығы мен ахуалдық орталық – қала қауіпсіздігі

Деректерді өңдеу орталығы қалалық деректерді, бейнеағындарды және жасанды интеллект негізіндегі талдау нәтижелерін орталықтандырылған түрде сақтауға және өңдеуге арналған. Орталық халықаралық TIER III сенімділік стандарты мен ұлттық ақпараттық қауіпсіздік талаптарына сай құрылды.

Осы инфрақұрылымға негізделген Қалалық ахуалдық орталық бейнебақылау, жедел қызметтер мен коммуналдық жүйелерді біріктіріп, қаланы басқарудың бірыңғай цифрлық жүйесін қамтамасыз етеді.

Бейнебақылау, мектептер мен балабақшалар – қауіпсіздік шаралары

Бүгінгі күні платформаға 60 мыңнан астам камера қосылған және 35 AI-сценарий енгізілген. Бұл сценарийлер түтін мен өртті, адамдардың көп шоғырлануын, төбелес сияқты штаттан тыс жағдайларды анықтауға мүмкіндік береді. 1 200-ден астам аппараттық-бағдарламалық кешен жол қозғалысы ережелерін бұзудың 15 түрін автоматты тіркейді.

• 2022–2025 жылдары 860 нысанда 4 430 камера орнатылды.
• 2026 жылы тағы 240 нысанда 1 200 камера орнату жоспарланған, оның 1 142-сі қазір орнатылды.
• Мектептерде: 2026 жылы 100 мемлекеттік мектепте шамамен 2 000 камера және 100 SOS дабылы орнатылған; бірыңғай жүйеге 10 мыңнан астам мектеп камерасы интеграцияланған.
• Балабақшаларда бірінші кезеңде 1 700 камера, 100 дабыл түймесі, 100 бейнедомофон орнату және бар 4 000 камераны интеграциялау жоспарланған.

Цифрлық сервистер, денсаулық сақтау және 5G – қауіпсіздік

Бірыңғай жүйеге 18-ден астам қалалық қызмет интеграцияланған: оқиғалар туралы ақпарат беру уақыты 10 минуттан нақты уақыт режиміне дейін қысқарды. Бірінші жартыжылдықта 2,5 мыңнан астам оқиға пысықталды.

Цифрлық сервистердің көрсетілуі де кеңейтілді: iKomek 109 орталығы 1,1 млн-нан астам өтінішті өңдеді, олардың 83%-ы алғашқы қоңырау кезінде шешілді. Birge платформасында 20 мыңнан астам пайдаланушы тіркеліп, шамамен 30 мың өтініш қаралды. Astana.kz порталына 14 мыңнан астам пайдаланушы тіркелген және 115-тен астам қызмет қолжетімді; берілген өтініштер саны 15 мыңнан асып отыр.

Денсаулық сақтау саласында Cerebra AI жүйесі үш инсульт орталығында енгізіліп, КТ кескіндері арқылы инсультті анықтау уақытын 5 минутқа дейін қысқартты; бірінші жартыжылдықта 5,7 мыңнан астам зерттеу өңделді. Әскери қызметке шақырылушылардың медициналық куәландыруы толық цифрланды, жүйе арқылы 7,4 мыңнан астам адам өтті. Денсаулық сақтау ахуалдық орталығы 29 медициналық ұйымның деректерін 220-дан астам индикатор бойынша біріктіреді.

Телеком инфрақұрылымы бойынша қалада 5G стандартының 423 базалық станциясы жұмыс істейді, жыл соңына дейін тағы 74 станция орнату жоспарланған. Байланыс сапасы жеткіліксіз деп анықталған 22 аймақтың 12-сінде мәселе шешілді.

AI жобалары мен инновациялар – қаланың қауіпсіздігі мен дамуы

AI Lab қалалық инновациялық экожүйені дамытып, AI кеңесін, R&D-қорын және акселерациялық бағдарламаларды біріктіріп отыр. R&D-контурында шамамен 11 стартап пен технологиялық жоба сүйемелденуде. Astana Innovations Accelerator бағдарламасының үшінші легіне 300-ден астам өтініш келіп, 29 стартап таңдалды.

Социальды жобалар қатарында «Шарапат» орталығындағы Úmit пилоттық жобасы бар: ол қозғалысы шектеулі адамдарға қолдың көмегінсіз смартфон, компьютер, электрлік мүгедектер арбасын және басқа құрылғыларды басқаруға мүмкіндік береді.

«Бірінші жартыжылдық қорытындысы бойынша елорданың цифрлық трансформациясы жекелеген шешімдерден оларды қаланы басқару жүйесінде кешенді қолдану кезеңіне өтіп отыр. Біздің міндетіміз – технологиялар тұрғындарға нақты нәтиже беріп, қауіпсіздікті арттыруы, қызметтерді алуды жеңілдетуі және қалалық процестердің тиімділігін күшейтуі», – деді Берік Ахметов.

Дереккөз: gov.kz