Оралда мас жүргізуші бір түнде жол ережесін 6 рет бұзып, 18 тәулікке қамалды
Батыс Қазақстан облысының орталығы Оралда мас күйінде көлік басқарған 37 жастағы жергілікті тұрғын ұсталды. Ол бір түнде 6 құқық бұзушылық жасаған. Оқиға 3 қазанға қараған түні болды.
Орал полициясы жүргізушіні қалай тоқтатты
БҚО Полиция департаментінің патрульдік полиция батальоны қызметкерлері Төле би көшесінде патрульдеп жүрген. Олар Hyundai Tucson автокөлігін басқарған жүргізушінің көлік жүргізу мәнеріне күмән келтіріп, оны тоқтауға мәжбүрлейтін белгі берді.
Жүргізуші полицияның заңды талабына бағынбады. Ол жылдамдығын арттырып, қашуға әрекеттенді. Полиция қызметкерлері көлікті тоқтатып, жүргізушінің жеке басын анықтады.
Жүргізуші бір түнде қандай ережені бұзды
Медициналық куәландыру нәтижесінде ер адамның алкогольдік масаң күйде болғаны расталды. Жалпы ол 6 құқық бұзушылық жасаған:
- полиция қызметкерінің заңды талабына бағынбаған;
- жол белгісінің талабын бұзған;
- бағдаршамның тыйым салатын сигналына екі рет өткен;
- қарсы бағыттағы жолаққа шыққан;
- мас күйінде көлік басқарған.
Полиция құқық бұзушыны уақытында тоқтатып, жол-көлік оқиғасының және өзге де ауыр салдардың алдын алды. Көлік арнайы тұраққа қойылды.
Сот жүргізушіге қандай жаза тағайындады
Сот шешімімен кінәлі адам 18 тәулікке әкімшілік қамаққа алынды. Оған қоса ол 7 жыл 6 ай мерзімге көлік басқару құқығынан айырылды.
Дереккөз: gov.kz
