Қазақстан колледждері жыл сайын 51 мыңнан астам жұмысшы маман даярлайды

Қазақстан президентінің тапсырмасына сәйкес, Оқу-ағарту министрлігі білім беру саласының цифрлық инфрақұрылымын жетілдіру, жасанды интеллектіні енгізу және еңбек нарығына қажетті кадрларды даярлау бойынша шаралар қабылдап жатыр. Бұл туралы Үкімет отырысында оқу-ағарту министрі Жұлдыз Сүлейменова мәлімдеді.

Білім беру жүйесінде цифрлық технологиялар

Ұлттық білім беру деректер базасы (ҰБДБ) білім берудің бірыңғай цифрлық архитектурасын қалыптастыратын маңызды жобаға айналмақ. Бұл база оқытуды басқару жүйелерімен біріктіріліп, цифрлық ресурстарды бір орталыққа шоғырландырады және мұғалімдердің әкімшілік жұмыстарын жеңілдетеді.

Одан бөлек, орта білім беру ұйымдарына жасанды интеллект енгізу көзделуде. Бұл, әсіресе, қала мен ауыл мектептері арасындағы білім сапасындағы алшақтықты азайтуға мүмкіндік береді. Педагогтер үшін де құжаттама көлемі 25-тен 5 атауға дейін қысқармақ.

Техникалық және кәсіптік білім беру

Елде қазіргі уақытта 763 техникалық және кәсіптік білім беру ұйымы жұмыс істейді. Онда 577 мыңға жуық студент білім алуда. 2030 жылға қарай бұл көрсеткіш 681 мыңға дейін өседі деп жоспарланып отыр.

Жұмысшы мамандықтар бойынша 480 колледжде 131 мыңнан астам студент оқып жатыр. Жыл сайын 51 мыңнан астам түлек жұмысшы мамандығын меңгеріп шығады. Құрылыс саласында оқитын студенттер саны – 13 мыңға жуық.

Сұранысқа ие мамандықтарды дамыту

Алдағы жылы «Жалпыхалықтық ауқымды құрылыс жылы» деп жариялануына байланысты, сұранысқа ие мамандықтарға мемлекеттік білім беру тапсырысы көбейтіледі. Сонымен қатар, колледждердің жұмыс берушілермен серіктестігі күшейтіледі.

Дереккөз: gov.kz