Общество

Павлодар облысында «Таза Қазақстан» аясында 6,6 мыңнан астам құқық бұзушылық анықталды

Павлодар облысында «Таза Қазақстан» акциясы аясында полиция қызметкерлері экология және табиғатты қорғау органдарымен, қоғамдық ұйымдармен бірлесіп рейдтер өткізуде. Бұл іс-шаралар рұқсат етілмеген қоқыс орындарын анықтауға, қоғамдық орындар мен демалыс аймақтарында тазалықты қамтамасыз етуге бағытталған.

6 656 құқық бұзушылық тіркелді

Рейд нәтижесінде облыста қалалар мен елді мекендердің аумағын абаттандыру қағидаларын бұзу және қоғамдық орындарды ластау бойынша 6 656 құқық бұзушылық анықталды. Барлық құқық бұзушылар әкімшілік жауапкершілікке тартылып, жалпы сомасы 6,5 миллион теңгеден астам айыппұл салынды. Қалдықтарды басқару саласындағы заң бұзушылықтар бойынша материалдар Экология департаментіне жолданды.

Заңсыз қоқыс төгу деректері анықталды

Полиция қызметкерлері рұқсат етілмеген қоқыс орындары жиі кездесетін аумақтарға ерекше назар аударып отыр. Мысалы, Павлодар қаласының Солтүстік өнеркәсіптік аймағында жүк көлігінің жүргізушісі құрылыс қалдықтарын заңсыз төккені анықталды. Бұл дерек бойынша материалдар тиісті шешім қабылдау үшін Экология департаментіне жіберілді.

Құқық бұзушылықтарды анықтау жұмыстары жалғасуда

Полиция қызметкерлері экологиялық құқық бұзушылықтарды анықтау үшін Жедел басқару орталығының мүмкіндіктерін де пайдаланып келеді. Қазан айында бейнебақылау камералары арқылы жүк көлігі жүргізушісінің қалдықтарды заңсыз төккені белгілі болды. Тағы бір осындай дерек аумақты мониторингтеу кезінде тіркелді.

Түсіндіру және алдын алу жұмыстары

Акция аясында полиция қызметкерлері тұрғындар арасында табиғатқа ұқыпты қарау, қоғамдық орындарда тазалық сақтау және демалыстан кейін қоқыс қалдырмау туралы түсіндіру жұмыстарын жүргізуде. Облыс тұрғындары мен қонақтары абаттандыру қағидаларын сақтауға, экологиялық мәселелерге бейжай қарамауға және құқық бұзушылықтар анықталған жағдайда құқық қорғау органдарына хабарлауға шақырылады.

Дереккөз: gov.kz

Другие новости

Back to top button