«Игілік» және «Береке» бағдарламалары бойынша малды сақтандыру міндетті болды

Қазақстанда «Игілік» және «Береке» бағдарламалары аясында ауыл шаруашылығы жануарларын сатып алу және шаруашылықтарға жеткізу жұмыстары жүргізіліп жатыр. Бұл бағдарламалар бойынша несие алу үшін сатып алынған мал міндетті түрде сақтандырылуы шарт. Мемлекет сақтандыру сыйақысының 80%-ын субсидиялайды, бұл фермерлер үшін айтарлықтай жеңілдік саналады.

Бағдарламалардың мақсаты мен ерекшелігі

«Игілік» бағдарламасы ірі қара мен ұсақ малдың импорттық және отандық асыл тұқымды түрлерін, сондай-ақ жылқы, түйе, шошқа, марал сияқты жануарлар мен ара отбасыларын сатып алуға бағытталған. «Береке» бағдарламасы ірі көлемде импорттық асыл тұқымды ірі қара мен ұсақ мал сатып алатын шаруашылықтарға арналған.

Мал сатып алу және сақтандыру шарттары

Сатып алынған малды тиісті есепке қою, оның күтімін қамтамасыз ету, ветеринариялық қызметпен қамту және сақтандыру шартын рәсімдеу қажет. Сақтандыру несие берудің міндетті талабы болып табылады. Мал шаруашылығын сақтандыру тек аурудан қорғаумен шектелмейді, оған басқа да түрлі тәуекелдер кіреді.

Сақтандыру қандай тәуекелдерді қамтиды

• Жұқпалы, инвазиялық және жұқпалы емес аурулар;
• Жазатайым оқиғалар: найзағай, электр тоғы, ыстық өту, үсіп қалу, тұншығу, аңдардың шабуылы, улану, жылан мен жәндіктердің шағуы, суға бату, жартастан құлау және тағы басқа;
• Табиғи құбылыстар: су тасқыны, қар көшкіні, жер көшкіні, дауыл, жел, бұршақ, өрт;
• Аса қауіпті аурулар анықталса, жануарларды мәжбүрлеп алып қою және жою кезінде келетін шығындар (мысалы, сібір жарасы, аусыл, бруцеллез, туберкулез).

Сақтандыру мерзімі мен рәсімдеу тәртібі

Сақтандыруға ірі қара, ұсақ мал, жылқы, шошқа және ауыл шаруашылығы құстары қабылданады. Шарт 3, 6, 9 немесе 12 айға жасалады. Мерзімді шаруашылықтың өндірістік цикліне қарай таңдауға болады. Мал өсіру, күтіп-бағу және өткізу мерзімдері толық жылмен сәйкес келмейтін шаруашылықтар қысқа мерзімді сақтандыруды рәсімдей алады.

Сақтандыру шығыны қалай өтеледі

Сақтандыру сыйақысының 20%-ын фермер өзі төлейді, қалған 80%-ын мемлекет субсидиялайды. Бұл тетік агроөнеркәсіп кешеніндегі сақтандыру сыйақыларын мемлекеттік қолдау бағдарламасы аясында іске асады.

Сақтандыруды онлайн рәсімдеу және төлем тәртібі

Сақтандыруды Kezekte.kz платформасындағы QALQAN сервисі арқылы онлайн рәсімдеуге болады. Ол үшін электрондық цифрлық қолтаңба арқылы жүйеге кіріп, сақтандыру өнімін, компаниясын және нысанын таңдау керек. Барлық жануарлар ауыл шаруашылығы жануарларын бірдейлендіру жүйесінде тіркелген болуы тиіс. Сақтандыру төлемін алушы ретінде фермердің өзін немесе несие берушіні көрсетуге болады.

Сақтандыру жағдайы туындаса, өтініш те онлайн беріледі. Төлем шарт талаптарына сай жүзеге асырылады және оның мөлшері сақтандыру өніміне, сомасына және франшизаға байланысты. «Аграрлық несие корпорациясы» агросақтандыру операторы ретінде фермерлердің тәуекелдерін азайтуға бағытталған мемлекеттік қолдау тетіктерін іске асырады.

Дереккөз: gov.kz