Астанада полицейлер ата-аналарға есірткі қылмысының алдын алу шараларын түсіндірді
Астанадағы Шерхан Мұртаза атындағы №63 мектеп-гимназиясында ата-аналар жиналысы өтті. Жиын барысында полиция қызметкерлері есірткіге қатысты құқық бұзушылықтар мен жасөспірімдер арасындағы қылмыстың алдын алу шараларын түсіндірді.
Есірткіге қатысты заң бұзушылықтың салдары түсіндірілді
Полиция өкілдері ата-аналарға есірткі заттарын қолдану және таратудың зардаптары, заңдағы жауапкершілік, сондай-ақ кәмелетке толмағандардың құқыққа қайшы әрекеттерге тартылу қаупі туралы мәлімет берді. Олар баланың мінезіндегі өзгерістерге, достарымен қарым-қатынасы мен қызығушылықтарына мән беру керек екенін айтты.
Ата-ана бақылауының рөлі және кеңестер
Кездесуде құқық бұзушылықтың алдын алу үшін ата-ананың бақылауы мен тәрбиесінің маңызы ерекше аталды. Полиция қызметкерлері күмәнді белгілерді ерте анықтау арқылы келеңсіз жағдайлардың алдын алуға болатынын ескертті.
Шараға қоғам өкілдері қатысты
Жиналыста есірткіге байланысты құқық бұзушылықтың алдын алу жөніндегі кеңес мүшесі, «Қазақстан Республикасының Пенчак Силат қауымдастығының» директоры, халықаралық дәрежедегі спорт шебері Нұрсұлтан Әлиакбаров сөз сөйледі.
Бала қауіпсіздігі үшін ата-ана мен мектептің бірлескен әрекеті маңызды
Қалалық Полиция департаменті мұндай кездесулер мектеп пен ата-аналардың бірлесе жұмыс істеуіне ықпал ететінін атап өтті. Құқық бұзушылықтың алдын алу жұмысы тек мектепте ғана емес, отбасында да жалғасуы тиіс.
Дереккөз: gov.kz
