Қазақстан мен Қытай арасында қаржы-экономикалық әріптестік кеңейеді
Алматыда өткен II Тянь-Шань форумы аясында Қазақстан мен Қытайдың қаржы-экономикалық байланыстарын нығайту жолдары қарастырылды. Кездесуге Қазақстанның Премьер-министрінің орынбасары – Ұлттық экономика министрі Серік Жұманғарин, ҚХР Қаржы министрі Лан Фоан, сондай-ақ екі елдің қаржы ұйымдарының жетекшілері қатысты.
Бірлескен инвестициялық қор құру ұсынылды
Кездесу барысында тараптар Қазақстан мен Қытайдың инвестициялық құрылымын қалыптастыру мәселелерін талқылады. Атап айтқанда, бірлескен тікелей инвестициялар қорын ашу, үлестік, займдық және сақтандыру қаржыландыру тетіктерін біріктіру мүмкіндіктері қаралды. Бұл бастамалар капиталға қолжетімділікті арттырып, ірі жобаларды жүзеге асыруға жаңа мүмкіндіктер береді.
Ірі инфрақұрылымдық жобаларға инвестиция тарту
Тараптар Транскаспий халықаралық көлік бағытына ерекше көңіл бөлді. Сонымен қатар, Алматы метрополитенін дамыту, Астананың көлік инфрақұрылымын жақсарту, «Орталық-Батыс» автомобиль жолын салу, Астананың сумен жабдықтау жүйесін жаңғырту сынды жобаларды қаржыландыру жолдары сөз болды. Қазақстан делегациясы осы бастамаларды іске асыруға екі елдің қаржы институттарын тартудың маңызын атап өтті.
Ынтымақтастықты нығайтуға уағдаласты
Кездесу қорытындысында екі жақ қаржы саласындағы әріптестікті тереңдетуге, қаржы ұйымдары арасындағы тікелей байланыстарды арттыруға және ортақ экономикалық жобаларды жүйелі түрде жүзеге асыруға мүдделі екенін жеткізді.
Дереккөз: gov.kz
