Қазақстанда 24 салалық ЕҚТ анықтамалығы бекітілді: өнеркәсіп экологиялық стандарттарға көшеді
Қазақстанда энергетика, тау-кен өндірісі, металлургия және химия өндірісі сияқты негізгі салаларды қамтитын 24 ең үздік қолжетімді техникалар (ЕҚТ) анықтамалығы әзірленіп, бекітілді. Бұл анықтамалықтар 2026 жылы жаңартылған экологиялық заңнама талаптарына сәйкес қайта бекітіледі.
ЕҚТ жүйесін дамыту және өнеркәсіп кәсіпорындарын заманауи экологиялық стандарттарға бейімдеу жұмысын «Халықаралық жасыл технологиялар және инвестициялық жобалар орталығы» (IGTIC) жанындағы ЕҚТ бюросы жүргізеді. Анықтамалықтарды дайындау барысында отандық өнеркәсіптің ерекшеліктері, халықаралық тәжірибе және кәсіпорындардың техникалық мүмкіндіктері ескеріледі.
Кешенді технологиялық аудиттің рөлі
ЕҚТ-ға көшу барысында кәсіпорындарда кешенді технологиялық аудит (КТА) жүргізіледі. Бұл аудит өндірістік процестердің жай-күйін, қолданылатын жабдықтарды, шикізат, су және энергия ресурстарын пайдалану тиімділігін бағалауға мүмкіндік береді. Сонымен қатар, қоршаған ортаға әсер ететін негізгі көздер анықталады.
Аудит аясында мамандар кәсіпорындардың технологиялық схемаларын қарап, шығарындылар мен қалдықтар түзілуін зерттейді. Сондай-ақ қолданыстағы табиғатты қорғау шаралары талданып, өндірістің экологиялық және ресурстық тиімділігін арттыру жолдары қарастырылады. КТА нәтижелері ЕҚТ анықтамалықтарын әзірлеуге негіз болады.
Кешенді экологиялық рұқсат және кәсіпорындарға пайдасы
ЕҚТ анықтамалықтары кешенді экологиялық рұқсат (КЭР) алуға арналған басты құрал саналады. Қазақстанның Экология кодексіне сәйкес, КЭР I санаттағы объектілер үшін талап етіледі. Бұл рұқсат кәсіпорын қызметінің экологиялық шарттарын ЕҚТ талаптарын ескере отырып белгілейді және өндірістік қызметтің қоршаған ортаға әсерін кешенді реттеуге жол ашады.
Кәсіпорындарда ЕҚТ енгізу арқылы өндірістік қуаттарды жаңғырту, энергия тиімділігін арттыру, табиғи ресурстарды азайту және экологиялық тәуекелдерді төмендету мүмкіндігі бар.
Орталық Азияда ЕҚТ бюросын құру бастамасы
Қазіргі таңда Орталық Азияда ЕҚТ бюросын құру мәселесі қарастырылып жатыр. Бұл бастама алғаш рет БҰҰ-ның Климаттың өзгеруі туралы негіздемелік конвенциясы тараптарының 29-конференциясында (COP29) халықаралық деңгейде ұсынылды.
Дереккөз: gov.kz
