Экология министрі азаматтардың өтініштерін жеке қабылдап, өзекті мәселелерді талқылады
Экология және табиғи ресурстар министрі Әлібек Қуантыров азаматтарды қабылдап, экология саласына қатысты түрлі өтініштерді тыңдады. Кездесу кезінде тұрғындар экологиялық жобаларды қаржыландыру, бейінді үкіметтік емес ұйымдардың «Таза Қазақстан» тұжырымдамасына қатысуы, инвестициялық жобаларды жүзеге асыру, экологиялық нормалардың сақталуы, қатты тұрмыстық қалдықтарды шығару және басқа да мәселелерді көтерді.
Өтініштерге толық жауап берілді
Әрбір мәселе бойынша азаматтарға қолданыстағы заңнама аясында толық түсіндірме ұсынылды. Министрлік өкілдері экологиялық қауіпсіздікті сақтау, қалдықтарды орналастыру нысандарын пайдалану және қалдықтарды басқару жобаларын іске асыруға ерекше назар аударды.
Теміртау маңындағы экологиялық жағдай бақылауда
Қарағанды облысының тұрғындарын қабылдау барысында Әлібек Қуантыров Теміртау қаласына жақын орналасқан Аққұдық станциясындағы экологиялық ахуалды мемлекеттік деңгейде тексеруге өзі қатысатынын айтты.
Көтерілген мәселелер қаралады
Қабылдау қорытындысы бойынша министрліктің құрылымдық бөлімшелері мен аумақтық департаменттеріне әр өтінішті өз құзыреті шегінде қарау және қабылданып жатқан шаралар туралы азаматтарды хабардар ету тапсырылды. Министрлік халықпен ашық диалог орнату, қоршаған ортаны қорғау және табиғи ресурстарды тиімді пайдалану мәселелерін шешуге бағытталған жұмысты жалғастырады.
Дереккөз: gov.kz
