ТЖМ-де қысқы төтенше жағдайларға дайындық талқыланды
Бүгін Төтенше жағдайлар вице-министрі Рамиль Камаловтың жетекшілігімен азаматтық қорғау жүйесін қысқы кезеңге дайындауға арналған ведомствоаралық мемлекеттік комиссияның отырысы өтті. Жиынға орталық мемлекеттік органдар, өңір әкімдерінің орынбасарлары, ТЖМ аумақтық бөлімшелері және тиісті ұйымдардың өкілдері қатысты.
Қысқы кезеңге дайындық барысы
Отырыста энергетика мен тіршілікті қамтамасыз ету нысандарының дайындық деңгейі, автомобиль жолдарының қауіпсіздігі, қар құрсауы, қар көшкіні мен мұзға қатысты төтенше жағдайлардың алдын алу шаралары талқыланды. Сондай-ақ, энергетикалық объектілердегі жөндеу жұмыстарын уақытында аяқтау, халықты отынмен қамтамасыз ету, жол қызметтері мен жылыту пункттерінің әзірлігіне мән берілді.
Ведомствоаралық үйлестіру және қосымша шаралар
Отырыста ауа райы күрделенген жағдайда ведомствоаралық өзара іс-қимыл ұйымдастыру, қар басуы ықтимал жол учаскелерінде тұрақты ұялы байланысты қамтамасыз ету, иіс газынан уланудың алдын алу және су айдындарында профилактикалық шараларды күшейту мәселелері көтерілді. 1 қарашадан бастап ТЖМ-нің Стратегиялық жоспарлау және жедел басқару орталығы жанынан қысқы төтенше жағдайларға әрекет ету жөніндегі жедел штаб жұмысын бастайды. Осындай штабтар өңірлерде де құрылады.
Негізгі бағыттар айқындалды
Отырыстың қорытындысында қыс мезгілі қауіпсіз өтуі үшін, төтенше жағдайлардың алдын алу мен ықтимал қауіптерге уақытылы әрекет ету мақсатында мемлекеттік және жергілікті атқарушы органдардың басты жұмыс бағыттары белгіленді.
Дереккөз: gov.kz
