Магистратура және докторантураға түсуге өтініш қабылдау 28 қазанда басталады
Өтініш қабылдау мерзімі
28 қазанда магистратураға кешенді тестілеуге және докторантураға түсу емтиханына өтініштер қабылдау басталады. Өтініштер ҚР Ғылым және жоғары білім министрлігі Ұлттық тестілеу орталығының app.testcenter.kz сайты арқылы қабылданады. Құжаттарды тапсыру мерзімі – 2026 жылғы 10 қарашаға дейін.
Магистратураға түсу тәртібі
Кешенді тестілеуге өтініш беру кезінде үміткер тестілеу өтетін қаланы өз еркімен белгілей алады. Өтініш қабылдау аяқталғанға дейін (10 қарашаға дейін) білім беру бағдарламаларының тобы, тілі және тестілеу өтетін қала бойынша өзгерістер енгізуге болады. Ал өтініштерді қабылдау базасы жабылған соң, бұл мәліметтер өзгермейді. Кешенді тестілеу қараша-желтоқсан айларында өтеді. Тестілеу күні туралы ақпарат 13 қарашада жеке кабинетте жарияланады.
Ғылыми-педагогикалық магистратураның кешенді тестілеуі электронды форматта өтеді және үш бөлімнен тұрады: шет тілі, оқуға дайындығын анықтау және бейіндік пәндер тесті. Барлығы 3 сағат 55 минут беріледі. Шекті ұпай – 75 балл: шет тілінен кемінде 25, дайындығын анықтаудан кемінде 7, әр бейіндік пәннен кемінде 7 балл жинау қажет.
Бейінді магистратураға түсушілер тек бейіндік пәндер бойынша тест тапсырады. Бұл бағытта шекті ұпай – 30 балл, әр пәннен кемінде 7 балл алу керек.
Шығармашылық дайындықты қажет ететін бейінді магистратура бағдарламаларына құжат қабылдау 28 қазан мен 10 қараша аралығында жоғары оқу орындарында жүргізіледі.
Докторантураға түсу талаптары
Докторантураға түсу емтиханына қатысу үшін өтініштер 10 қарашаға дейін қабылданады. Үміткерлер құжаттарын жоғары немесе жоғары оқу орнынан кейінгі білім ұйымдарының қабылдау комиссиясына тапсырады. Магистратураны бітірген үміткерлер мемлекеттік тіл және шет тілін меңгеру туралы сертификат ұсынуы тиіс. TOEFL ITP сертификаты барлар ағылшын тілінен қосымша тест тапсырады.
Докторантураға түсу емтиханы желтоқсан айында өтеді. Өтінішке өзгерістер енгізу немесе жою мүмкіндігі 10 қарашаға дейін ашық. Қосымша тестілеу орны мен уақыты туралы ақпарат 13 қарашада, ал негізгі емтихан туралы мәлімет 26 қарашада жеке кабинетте жарияланады.
Докторантураға қабылдау шарттары
PhD докторантурасына түсу емтиханына әңгімелесу, эссе және бейіндік пәндер бойынша тест кіреді. Индустриялық PhD және бейіні бойынша докторлар бағдарламасына түсу емтиханында әңгімелесу және бейіндік пәндер сұрақтары қарастырылады. Мемлекеттік грант арқылы PhD бағдарламасына түсу үшін кемінде 75 балл, ал басқа докторлық бағдарламаларға кемінде 50 балл жинау қажет. Бұл талаптарды орындағандар конкурс негізінде қабылданады.
Дереккөз: gov.kz
