Астанада Республика күні ерекше балаларға арналған қайырымдылық цирк қойылымы өтті
Астанада Республика күні қарсаңында «Pro цирк» қайырымдылық бағдарламасы өтті. Шараға Қазақстан, Ресей және Өзбекстан елдерінен цирк әртістері қатысты. Бағдарламаны ұйымдастырушылар ерекше қажеттілігі бар балалар мен әлеуметтік қолдауды қажет ететін азаматтарды арнайы шақырды.
Мерекелік цирк қойылымы Астана циркінің манежінде ұйымдастырылды. Көрермендерге акробаттар, эквилибристер, жонглерлер мен сайқымазақтар өнер көрсетті. Ұйымдастырушылардың айтуынша, мұндай шаралар мәдени іс-шараларға түрлі санаттағы азаматтардың қолжетімділігін арттыруға бағытталған.
Елорда циркінің қоғаммен байланыс және ақпарат бөлімінің басшысы Айнұр Бұлдыбаева Республика күнін қайырымдылық шарасымен атап өтудің маңыздылығын атап өтті. Ол «Pro цирк» бағдарламасының Қазақстан, Ресей және Өзбекстан өнерпаздарын біріктіріп, ерекше балалардың цирк өнерімен жақынырақ танысуына мүмкіндік беретінін айтты.
«Астана қаласының мүгедек балалары қоғамы» қоғамдық бірлестігінің әлеуметтік көмек бөлімінің меңгерушісі Нұргүл Жолдығұлова Астана циркіне алғыс білдіріп, мұндай іс-шаралардың балалар үшін ерекше әсер мен қуаныш сыйлайтынын жеткізді. Оның айтуынша, балалар мерекелік бағдарламаға қатысып, уақытын қызықты өткізіп, мерекелік көңіл күйге бөленді.
Дереккөз: gov.kz
