Астанада «Алан туралы аңыз» толықметражды анимациялық фильмі таныстырылды

Астанада «Алан туралы аңыз» атты толықметражды анимациялық фильмнің тұсаукесері өтті. Бұл жобаны Қазақстан Республикасы Мәдениет және ақпарат министрлігінің тапсырысымен, Ұлттық киноны қолдау мемлекеттік орталығының қолдауымен «САҚ» киностудиясы түсірді.

Фильмнің мазмұны мен негізгі идеясы

Көрсетілімге отандық кино индустриясының өкілдері, мәдениет және өнер қайраткерлері, журналистер мен шығармашылық топ мүшелері қатысты. Фильм оқиғасында Қаражалдың әскері бейбіт қаланы басып алады. Батыр Барыстың ұлы Алан туған еліне оралып, достарымен бірге қаланы азат ету үшін күрес жүргізеді.

Ұлттық құндылықтар және көрерменге арналуы

Анимациялық туынды ұлттық және тарихи-мәдени құндылықтарды заманауи тәсілде көрсетеді. Ерлік, достық, әділдік пен мейірімділікке негізделген оқиға алты жастан асқан көрермендерге арналған.

Фильм авторлары мен шығармашылық топ

Ұлттық киноны қолдау мемлекеттік орталығының басқарма төрағасы Құрманбек Жұмағали балаларға арналған фильмдердің тәрбиелік маңызына тоқталды. Режиссер – Азамат Ерназаров, сценарий авторлары – Бақытжан Құлжабаев, Батырхан Дәуренбеков және Азамат Ерназаров, продюсер – Нұриддин Паттеев.

Дереккөз: gov.kz