Шымкенттегі тозған шиналарды қайта өңдеу қуаты 10 мың тоннаға жетті
Шымкентте ескі автокөлік шиналарын қайта өңдейтін зауыттың жаңғырту жұмыстары аяқталды. Жоба ҚР Экология және табиғи ресурстар министрлігінің қолдауымен жүзеге асырылды. «Жасыл даму» АҚ кәдеге жарату төлемдері есебінен бөлген қаржы нәтижесінде «ЭКО Шина» ЖШС-нің өндірістік қуаты жылына 6 мың тоннадан 10 мың тоннаға дейін ұлғайды.
«Жасыл даму» АҚ жобаны қолдады
2024 жылдың қыркүйегінде «Жасыл даму» АҚ бұл өндірісті жетілдіруге 500 миллион теңге бөлді. Қаражат толық игеріліп, жаңартылған кәсіпорын іске қосылды. Бұл зауыт ескі шиналардан резеңке түйіршіктерін шығарады. Бұл түйіршіктер балалар және спорт алаңдарының жабындарын жасауға қолданылады. Сонымен қатар, кәсіпорында резеңке-техникалық бұйымдар, соның ішінде тығыздағыштар (сальниктер) өндіріледі.
Шикізат көлемі мен өңдеу қуаты өсті
Кәсіпорынның шиналарды қайта өңдеу қуаты жылына 4 мың тоннаға артты. Дайын өнім жасауға жұмсалатын қайталама шикізаттың көлемі де көбейді. Бұл жобаның іске асуы қалдықтарды басқару инфрақұрылымын жетілдіруге және қайта өңдеу көлемін ұлғайтуға ықпал етеді.
Қазақстанда қалдықтарды өңдеу жобалары
«Жасыл даму» АҚ жалпы сомасы 116 миллиард теңгеге жуық 30 жобаны кәдеге жарату төлемдері есебінен қаржыландырды. Мұндай жобалар қалдықтарды көмуге жіберу көлемін азайтып, қайталама шикізатты экономикалық айналымға тартуға мүмкіндік береді. Бұл бастамалар ҚР Экологиялық кодексінің талаптарына сай жүзеге асырылуда.
Дереккөз: gov.kz
