Астанадағы ауыл шаруашылығы жәрмеңкесіне екі күнде 50 мыңнан астам адам келді
17-18 қазан күндері Астанада Солтүстік Қазақстан, Павлодар және Ұлытау облыстарының тауар өндірушілері қатысқан ауыл шаруашылығы жәрмеңкесі өтті. Бұл шараға екі күн ішінде 50 мыңнан астам адам келді. Жәрмеңкеде елорда тұрғындарына 1600 тоннадан астам өнім ұсынылды.
Жәрмеңкеде сатылған негізгі өнімдер
Үш өңірдің өндірушілері жәрмеңкеге 300 тоннаға жуық ет пен ет өнімдерін жеткізді. Оның ішінде сиыр, жылқы және қой еті, қазы мен қарта қолжетімді бағамен сатылды. Сонымен қатар үйрек пен қаз еті, түрлі балық өнімдері, атап айтқанда сазан, көксерке, форель және албырт балықтары ұсынылды.
Сүт өнімдерінің де түрі көп болды. Үй сүті, айран, сүзбе, қаймақ, сары май және ірімшіктің бірнеше сұрыптары тиімді бағамен саудаға шықты. Павлодар облысынан әкелінген тұздалған және тұздалмаған майға сұраныс жоғары болғаны атап өтілді.
Жеміс-жидек пен балға сұраныс
Көкөністер мен жемістердің ішінде пияз, картоп, сәбіз, алма, алмұрт, құрма, банан, жүзім, мандарин, апельсин көп сатылды. Сондай-ақ қарбыз бен қауын да ұсынылды. Балдың түрлі сұрыптары мен күнбағыс майы нарықтағыдан төмен бағамен сатылды.
Дәстүрлі өнімдер мен қолөнер бұйымдары
Жәрмеңкеде Баянауыл мен Жаңаарқаның қымызына, Ұлытау облысынан әкелінген тұзды құртқа сұраныс ерекше болды. Сонымен қатар, шұжық, ірімшік, үйде дайындалған салаттар мен нан-тоқаш өнімдері де сатылды. Келушілерге ағаштан жасалған, ұлттық ою-өрнектермен безендірілген домбыралар және басқа да қолөнер бұйымдары ұсынылды.
Қосымша шаралар мен жәрмеңкенің маңызы
Келушілер үшін концерттік бағдарлама ұйымдастырылды. Жәрмеңке елорда тұрғындарына сапалы отандық өнімдерді қолжетімді бағамен сатып алуға, ал өңірлік өндірушілерге өз тауарларын көпшілікке таныстыруға мүмкіндік берді.
Дереккөз: gov.kz
