«Mugalim» фильмінің жабық көрсетілімі Алматыда өтті, бүгіннен прокатта
Алматыда қазақстандық «Mugalim» фильмінің жабық көрсетілімі өтті. Шараға фильмнің шығармашылық тобы, отандық кино саласының өкілдері, мәдениет қайраткерлері, журналистер мен блогерлер қатысты.
Сан-Себастьян фестивалінде фильм қалай көрсетілді
Фильмнің әлемдік премьерасы 20 қыркүйекте Сан-Себастьяндағы 74-ші халықаралық кинофестивальдің New Directors байқау бағдарламасында өтті. Бұл – А санатындағы ең көне халықаралық кинофестивальдердің бірі.
«Mugalim» осы фестивальдің байқау бағдарламасына енген, қазақстандық әйел режиссер түсірген тұңғыш фильм болды.
«Mugalim» фильмінің сюжеті неге құрылған
Туынды – режиссер Аяна Нұрдинованың тұңғыш толықметражды фильмі. Оқиға Балқаш қаласындағы музыка пәні мұғалімі Жандостың төңірегінде өрбиді.
Жандос шәкірттерін жақсы көреді, сонымен бірге өнер жолына түсуді армандайды. Үлкен қалаға көшуге мүмкіндік туғанда, ол арманы мен жақындарының қасында қалудың бірін таңдауға тиіс болады.
Фильмді кімдер түсірді
Фильм Балқаш қаласында түсірілді. Басты рөлдерді сомдағандар:
- Олжас Дәлелхан;
- Рүстем Жаныаманов;
- Шынар Жанысбекова;
- Ольга Ландина;
- Гүлнар Дусматова және өзге де актерлер.
Продюсер – Аружан Досымқожа, қоюшы оператор – Айгүл Нұрболатова. Туынды ҚР Мәдениет және ақпарат министрлігі мен Ұлттық киноны қолдау мемлекеттік орталығының қолдауымен жасалды.
Фильм кинотеатрларда қашан шығады
Бүгіннен бастап «Mugalim» фильмі Қазақстан кинотеатрларында кең прокатқа шықты.
Дереккөз: gov.kz
