ІІМ мен Kinopark Theatres есірткінің алдын алу бойынша меморандумға қол қойды
Ішкі істер министрлігінде Kinopark Theatres кинотеатрлар желісінің PR-директоры Ерлан Бұхарбаевпен жұмыс кездесуі өтті. Кездесу қорытындысымен есірткінің алдын алу және халық үшін қауіпсіз орта қалыптастыру бағытында ынтымақтастық туралы меморандумға қол қойылды.
Құжат мемлекет пен бизнестің күш-жігерін біріктіруді көздейді.
Меморандум бойынша ынтымақтастықтың негізгі бағыттары
Тараптар ең алдымен жастарға арналған бірлескен профилактикалық бастамаларды жүзеге асыруды талқылады. Негізгі бағыттардың бірі – мәдени-демалыс саласының мүмкіндіктерін пайдаланып, салауатты өмір салтын насихаттау және есірткіге саналы түрде теріс көзқарас қалыптастыру.
Kinopark Theatres өкілдері ІІМ бастамасын қолдайтынын айтты. Олар әлеуметтік серіктес ретінде профилактикалық іс-шараларға ерікті негізде қатысуға дайын екенін білдірді.
Кинотеатрларда есірткіге қарсы бейнероликтер көрсетіледі
Қазан айының алғашқы онкүндігінде отандық және шетелдік фильмдердің премьералық көрсетілімдері алдында есірткіге қарсы бейнероликтерді тұрақты көрсету тетігін пысықтау жоспарланған. Профилактикалық материалдар 18 қаладағы Kinopark Theatres кинотеатрларында көрсетіледі.
Бұл ақпараттық-түсіндіру жұмысының ауқымын едәуір кеңейтеді. Көрермендер есірткі тұтынудың салдары мен қауіп-қатерлері туралы маңызды ақпарат алады.
ІІМ бизнеспен өзара іс-қимылды қалай дамытады
ІІМ әлеуметтік жауапкершілігі жоғары бизнеспен өзара іс-қимыл есірткі тұтынудың кешенді профилактикасының маңызды бөлігі екенін атап өтті. Бірлескен жобалар арқылы:
- салауатты өмір салты құндылықтарын дәріптеуге;
- жастардың қауіпсіз әрі пайдалы бос уақыт өткізуіне жағдай жасауға;
- жастардың есірткі ортасына тартылуының алдын алуға заманауи әрі сұранысқа ие алаңдардың мүмкіндіктерін пайдалануға болады.
Министрлік «Заң мен Тәртіп» қағидатын ілгерілету аясында бизнеспен, мәдениет саласымен және қоғам өкілдерімен ынтымақтастықты дамытуды жалғастырады. Мемлекет пен қоғамның күш-жігерін біріктіру профилактикалық шаралардың тиімділігін арттырып, қауіпті азайтуға және қоғамдық қауіпсіздікті нығайтуға ықпал етеді.
Дереккөз: gov.kz
