Тегін дәрі-дәрмек: 7 жылда қазақстандықтарға 1,3 трлн теңге жұмсалды
Соңғы жеті жылда Қазақстанда тегін дәрі-дәрмекпен қамтамасыз етуге шамамен 1,3 трлн теңге бағытталды. Жыл сайын орта есеппен 3,3 млн пациент қажетті дәрілермен қамтамасыз етілген. Денсаулық сақтау министрлігі сатып алу жүйесін жетілдіріп, дәрі бағасын төмендету мен емнің қолжетімділігін арттыру жұмысын жалғастыруда.
Тегін дәрі-дәрмекке бөлінетін қаржы қанша өсті
2019–2025 жылдары тегін дәрі-дәрмекке бөлінетін қаржы үш еседен астам артты. Ол 83 млрд теңгеден 272,9 млрд теңгеге дейін ұлғайды.
Осы кезеңде тегін дәрі алатын пациенттер саны да өсті: 2,5 млн-нан 3,4 млн адамға жетті.
2026 жылғы дәрі сатып алу жоспары қандай
2026 жылы дәрілік заттар мен медициналық бұйымдарды сатып алудың жалпы жоспары 584,1 млрд теңге көлемінде бекітілді. Бұл өткен жылмен салыстырғанда 9,6%-ға көп.
Дәрі бағасы қалай төмендеді және тікелей сатып алу қалай кеңейді
Сатып алу жүйесін жетілдірудің басты нәтижелерінің бірі — отандық өндірістің 66 дәрілік препаратының бағасын төмендету болды. Бұл бюджет қаражатын 10,3 млрд теңге көлемінде үнемдеуге мүмкіндік берді.
Министрлік отандық және шетелдік өндірушілерден тікелей сатып алуды да кеңейтіп жатыр:
- 2025 жылы тікелей келісімшарттар бойынша 182 атау сатып алынған;
- 2026 жылы бұл көрсеткіш 404 атауға дейін өсті.
Халықаралық ұйымдар арқылы қанша атау сатып алынады
Халықаралық ынтымақтастық та кеңейіп жатыр. Биыл БҰҰДБ, ЮНИСЕФ және туберкулезбен күрес жөніндегі халықаралық тетіктер арқылы 32 атаудағы дәрілік заттарды сатып алу көзделген. Өткен жылы бұл көрсеткіш 23 атау болған.
Сатып алу тетіктерін жетілдіру бюджет қаражатын тиімді жұмсауға, дәрі жеткізілімінің тұрақтылығын қамтамасыз етуге және пациенттер үшін тегін дәрінің қолжетімділігін арттыруға бағытталған.
Дереккөз: gov.kz
