Ақтау портында су түбін тереңдету басталды: 1,3 млн текше метр топырақ алынады
Ақтау портында су түбін тереңдетудің негізгі жұмыстары басталды. Жоба порт инфрақұрылымының тұрақты жұмыс істеуін қамтамасыз етуге және Транскаспий халықаралық көлік бағыты (ТХКБ) бойынша тасымалдың тиімділігін арттыруға бағытталған.
Ақтау портында су түбін неге тереңдетіп жатыр
Тереңдету қажеттілігі Каспий теңізі деңгейінің төмендеуіне байланысты туындады. Бұл порт акваториясын пайдалану жағдайына және кеме қатынасына әсер етіп отыр.
Жоба аясында шамамен 1,3 млн текше метр топырақ алу көзделген. Нәтижесінде акваторияның тереңдігі 6–7 метрге дейін артады.
Жоба ТХКБ бойынша тасымалға қандай әсер етеді
Су түбін тереңдету порттың өткізу қабілетін арттыруға мүмкіндік береді. Жоба іске асқан жағдайда күтілетін нәтижелер:
- ТХКБ бойынша тасымал көлемі 30%-ға дейін өседі;
- жүкті теңіз арқылы тасымалдау құны шамамен 10–15%-ға төмендейді;
- порт инфрақұрылымын дамытуға инвестиция тартуға жол ашылады;
- теңізде жүзу қауіпсіздігі қамтамасыз етіледі.
Жұмыстар қашан аяқталады
Мердігер жұмыстарды орындау кестесін әзірлеп қойды. Жоба белгіленген мерзімге сәйкес жүзеге асырылып жатыр.
Ағымдағы мәселелерді жедел шешу және жобаға қатысушылардың әрекетін үйлестіру үшін жұмыс кеңестері тұрақты өткізіледі. Су түбін тереңдету жұмыстарын биылғы жылдың соңына дейін аяқтау жоспарланған.
Дереккөз: gov.kz
