«Үздік педагог» конкурсы: аудандық кезеңге 2145 педагог тіркелді
Елімізде «Үздік педагог» республикалық конкурсының аудандық кезеңіне 2145 педагог тіркелді. Іріктеу қорытындысы бойынша 939 қатысушы облыстық кезеңге жолдама алды. Қазір қорытынды кезеңге тіркелу жалғасып жатыр.
Конкурс Мемлекет басшысы Қасым-Жомарт Тоқаев айқындаған педагог мәртебесін арттыру және ұстаздарды қолдау бағытының аясында өтеді. Мақсаты – тәжірибесі мен нәтижесі жоғары мұғалімдерді анықтау.
Конкурсқа кімдер қатыса алады
Байқау мектепке дейінгі, орта, техникалық және кәсіптік, қосымша және арнайы білім беру ұйымдарының педагогтері арасында өткізіледі.
Қатысушының кемінде бес жыл үздіксіз педагогикалық еңбек өтілі болуы керек.
Республикалық кезең қашан және қалай өтеді
Конкурс қағидаларына енгізілген өзгерістерге сәйкес, іріктеу 27 тамызда басталды. Облыстық кезеңде жақсы нәтиже көрсеткен педагогтер республикалық кезеңге ұсынылды.
Республикалық кезең 22 қыркүйектен 15 қазанға дейін өтеді және екі турдан тұрады:
- Бірінші турда комиссия қатысушылар ұсынған материалдарды бағалайды.
- Екінші турда педагогтер белгіленген білім беру ұйымында сабақ немесе оқу қызметін өткізеді.
Қанша педагог жеңімпаз атанады және не беріледі
Республикалық комиссияның шешімімен «Үздік педагог» атағы 64 педагогке дейін беріледі. Олар былай бөлінеді:
- мектепке дейінгі білім беру ұйымдарынан – 10 педагогке дейін;
- орта, арнайы, мамандандырылған және қосымша білім беру ұйымдарынан – 34 педагогке дейін;
- техникалық және кәсіптік, орта білімнен кейінгі білім беру ұйымдарынан – 20 педагогке дейін.
Әр жеңімпазға 1000 АЕК, яғни 4 325 000 теңге көлемінде ақшалай сыйақы беріледі. Сонымен қатар арнайы куәлік пен «Білім беру ұйымының үздік педагогі» төсбелгісі тапсырылады.
Конкурс қашаннан бері өтеді
«Үздік педагог» республикалық конкурсы 2012 жылдан бастап өткізіліп келеді. Осы уақытта 816 педагог бұл атаққа ие болды. Өткен жылы конкурс қорытындысымен 64 педагог жеңімпаз атанды.
Дереккөз: gov.kz
