Aqtobe Creative Days Астанада 10-11 қазанда өтеді: қолөнер, театр, музыка және IT
Елордада 10-11 қазанда Aqtobe Creative Days фестивалі өтеді. Ақтөбе облысы қолөнер, дизайн, театр, музыка, әдебиет және технология бағытындағы жобаларын астаналықтар мен қала қонақтарына таныстырады. Бұл туралы елорда әкімдігінің ресми сайты хабарлады. Іс-шара Creative Aimaq республикалық жобасы аясында ұйымдастырылады.
Бағдарламада мыналар бар:
- Aqtobe Design авторлық топтамаларының көрсетілімі;
- «Алақай» қуыршақ театрының қойылымы;
- Ақтөбе туралы анимациялық фильм;
- композитор Серік Закарияның шығармашылық кеші;
- SherTer және «Жеребе life» жобаларының концерттік бағдарламалары.
Екі күн бойы қолөнер бұйымдары, IT жобалар мен кітап өнімдері қойылған көрме аймақтары жұмыс істейді. Келушілер зергерлік өнер, киіз басу, тері өңдеу және басқа да дәстүрлі қолөнер түрлері бойынша шеберлік сабақтарына қатыса алады. Aqtobe Creative Days Ақтөбе облысының заманауи креативті жобаларын бір алаңға жинап, өңір шеберлері мен авторларының жұмысын елордалық аудиторияға көрсетеді.
Іс-шара Qazaq Creative Hub орталығында, Астана қаласы, Жошы хан көшесі, 16/2 мекенжайында өтеді.
Дереккөз: gov.kz
