Құрманғазы атындағы консерватория оркестрі ЮНЕСКО-да гала-концерт өткізді
Париждегі ЮНЕСКО-ның бас ғимаратында The Planet of Art – 2026 халықаралық жастар фестивалінің алтыншы музыкалық кезеңі аясында «Келісім симфониясы» атты гала-концерт өтті. Бұл шарада Құрманғазы атындағы Қазақ ұлттық консерваториясының симфониялық оркестрі дирижер Барбара Поплавскаяның жетекшілігімен өнер көрсетті.
Концерттің ашылуында қатысушылар мен қонақтарды ЮНЕСКО Бас директорының мәдениет жөніндегі орынбасары Наяф әл-Файез құттықтады. Іс-шараға ЮНЕСКО Хатшылығының өкілдері, дипломатиялық корпус мүшелері, Франция қоғамының өкілдері және мыңнан астам қонақ қатысты.
Он елдің жас лауреаттары өнер көрсетті
Симфониялық оркестрмен бірге фестивальге Қазақстан, Әзербайжан, Қытай, Нидерланд, Румыния, АҚШ, Өзбекстан, Франция, Швейцария және Швециядан келген жас лауреаттар қатысты. Концерт барысында әлемдік классикалық шығармалар, қазақ халық музыкасы және заманауи эстрада туындылары орындалды.
Шараның ұйымдастырушылары мен ерекшелігі
Сахнада сондай-ақ поп-джаз ансамблі және ЮНЕСКО клубы мәртебесі бар А. Селезнёв атындағы Алматы хореографиялық училищесінің оқушылары өнер көрсетті. Фестивальді Қазақстанның ЮНЕСКО клубтарының ұлттық федерациясы Дүниежүзілік ЮНЕСКО клубтары мен қауымдастықтары федерациясымен бірге ұйымдастырды. Бұл іс-шара Қазақстанның аталмыш дүниежүзілік федерацияға төрағалығы аясында өткізілді.
Дереккөз: gov.kz
