Қазақстан мектептерінде 2026 жылдан бастап «Жеке қауіпсіздік» курсы енгізіледі

2026-2027 оқу жылынан бастап Қазақстандағы барлық орта білім беру ұйымдарында 5-11 сынып оқушыларына арналған «Жеке қауіпсіздік» курсы енгізіледі. Бұл курстың мақсаты – балаларға қауіпсіз жүріс-тұрыс дағдыларын үйрету, қауіп-қатерді дұрыс бағалау және қажет жағдайда ересектерден уақытылы көмек сұрауға бағыттау.

Курстың құрылымы және сабақ өткізу тәртібі

Оқу бағдарламасы оқушылардың жас ерекшеліктеріне сәйкес әзірленген. Курста өмірде кездесетін түрлі жағдайларды талдау, рөлдік ойындар мен арнайы жаттығулар арқылы қауіпсіз әрекет ету және эмоцияны басқару дағдылары үйретіледі. 5-8 сынып оқушылары үшін жылына 8 сағат, 9-11 сыныптарға 17 сағат бөлінген. Жоғары сыныптарда қосымша түзете-дамыту сабақтары қарастырылған.

Практикалық және диагностикалық бағыт

Бағдарламада практикалық әрі диагностикалық сабақтар бар. Оқу барысында оқушылардың психологиялық жағдайын анықтау үшін диагностика жүргізіледі. Бұл нәтиже бағалау немесе санаттарға бөлу үшін емес, әр баланың жеке қажеттілігін анықтап, тиісті қолдау шараларын жоспарлау үшін пайдаланылады.

Курсты кім жүргізеді және негізгі нәтиже

Сабақтарды мектептердің штаттық педагог-психологтары өткізеді. Курстың басты нәтижесі – оқушылардың алған білімдері мен жеке қауіпсіздік дағдыларын күнделікті өмірде қолдана білуі.

Дереккөз: gov.kz