Астанада Президент Жолдауындағы міндеттерді жүзеге асырудағы жастар үлесі талқыланды

Астанада «Жастар» ғылыми-зерттеу орталығы ұйымдастырған «Ұрпақтар диалогы: жастар және Қазақстанның болашағы» атты пікірталас өтті. Басқосуда сарапшылар мен студенттер Мемлекет басшысы Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты Жолдауын талқылады.

Іс-шараға Қазақстан Халық Кеңесінің мүшелері, мемлекеттік органдардың өкілдері, сарапшылар және ғалымдар қатысты. Жиында Президент Жолдауында белгіленген стратегиялық міндеттерді орындауда жастардың қосатын үлесі, сондай-ақ олардың ел дамуына қосатын нақты рөлі сөз болды.

Цифрлық экономика мен жасанды интеллект тақырыбы көтерілді

Пікірталастың барысында қатысушылар цифрлық экономиканы дамыту, жасанды интеллект пен жаңа технологиялардың болашағы жөнінде ой бөлісті. Бұл жаңалықтардың білім беру жүйесіне және еңбек нарығына қалай әсер ететіні талқыланды.

Сонымен қатар жастарды жұмыспен қамту, кәсіпкерлікті қолдау және олардың кәсіби қабілеттерін жетілдіру, өз мамандығы бойынша жұмыс істеуіне жағдай жасау мәселелері қарастырылды.

Білім сапасы мен жастардың жауапкершілігі

Білім беру сапасын арттыру, адами капиталды дамыту жайы да назардан тыс қалған жоқ. Қатысушылар жастардың зияткерлік және кәсіби әлеуетін ашуда жоғары білімнің маңызы жөнінде пікір алмасты.

Жолдауда көрсетілген басымдықтар аясында жастардың жауапкершілігін арттыру, қоғамдық бастамаларды қолдау, мемлекеттік органдар және қоғамдық ұйымдармен байланысын кеңейту мәселелері де сөз болды.

Жастар диалогын дамыту міндеті

Ашық пікірталас жастар арасындағы өзара диалогты нығайтуға және олардың ел өміріндегі белсенділігін арттыруға бағытталды.

Дереккөз: gov.kz