GhostTech жобасы HackAlem AI хакатонында «Білім беру» бағыты бойынша жеңіске жетті
23 қазанда жасанды интеллектке негізделген инновациялық шешімдер әзірлеуге арналған HackAlem AI халықаралық хакатонының жеңімпаздарын марапаттау рәсімі өтті. Бұл шараға NVIDIA компаниясының негізін қалаушы және бас атқарушы директоры Дженсен Хуанг қатысты. Марапаттау рәсімінде ҚР Ғылым және жоғары білім министрі Саясат Нұрбек құттықтау сөз сөйлеп, жасанды интеллектті дамыту мен жастардың жаңа идеяларын қолдаудың маңыздылығына тоқталды.
GhostTech жобасы – «Білім беру» бағытының жеңімпазы
«Білім беру» бағыты бойынша жеңімпаз атанған GhostTech жобасының авторы Ян Құрманбаев марапатқа ие болды. GhostTech – нақты бизнес міндеттері бар кәсіпкерлер мен сол міндеттерді шешуге дайын студенттік командаларды біріктіретін платформа. Жоба бизнес пен жоғары білім беру жүйесі арасындағы байланысты күшейтіп, студенттерге тәжірибе жинауға, кәсіби машықтарын жетілдіруге және портфолиосын толықтыруға мүмкіндік береді. Сонымен қатар, кәсіпкерлер студенттерді IT шешімдер мен жасанды интеллект өнімдерін әзірлеу үдерісіне тарта алады.
HackAlem AI хакатонына қатысушылар мен нәтижелері
Хакатонға барлығы 6 586 өтінім түсті, олардың шамамен 5 мыңын студенттер жіберген. Жалпы 2 500 адам қатысып, оның ішінде 1 600-і студент болды. Қатысушылардың 407-сі Қазақстанның түрлі өңірлерінен келген. Байқау қорытындысы бойынша әр бағыттан үш командадан, жалпы 36 жеңімпаз команда анықталды. Жеңімпаздар құрамында 77 адам, соның ішінде Қазақстанның 13 университетінен 49 студент бар.
HackAlem AI – жасанды интеллект экожүйесін дамыту алаңы
HackAlem AI хакатоны студенттер, әзірлеушілер және кәсіби қауымдастық өкілдері үшін жаңа технологиялық шешімдерді әзірлеу мен ұсынуға мүмкіндік берді. Бұл бастама Қазақстандағы жасанды интеллект экожүйесін жетілдіруге, жастардың әлеуетін ашуға және білім беру мен нақты экономика арасындағы байланысты нығайтуға септігін тигізеді.
Дереккөз: gov.kz
