Тұтынушыларға 9 айда 2,17 млрд теңгеден астам қаржы қайтарылды

2023 жылдың алғашқы тоғыз айында Сауда және интеграция министрлігінің Тұтынушылардың құқықтарын қорғау комитеті 2,17 млрд теңгеден астам ақшаның тұтынушыларға қайтарылуына ықпал етті. Осы аралықта Комитет пен оның аймақтық бөлімшелеріне 72 мыңнан астам өтініш түскен.

Өтініштердің негізгі бағыттары

Түскен өтініштердің 31 186-сы немесе 42,9 пайызы бөлшек сауда саласына қатысты болды. 12 264 өтініш (16,9%) электронды сауда мәселелеріне, ал 7 065 өтініш (9,7%) тұрмыстық қызмет көрсету саласына байланысты жолданған.

Комитеттің араласуымен 23 мыңнан астам өтініш бойынша тұтынушылардың талаптары орындалды. Тағы 26 мың өтініш иесіне құқықтық кеңес берілді. Қаражаттың басым бөлігі Алматы, Астана және Шымкент қалаларында қайтарылған.

Қоғамдық резонанс тудырған істер

Есепті кезеңде қоғам назарын аударған 107 іс қаралып, нәтижесінде 365 тұтынушының жалпы 1,03 млрд теңге көлеміндегі мүліктік құқығы қорғалды.

Тексеру және айыппұлдар

Министрлік өтініштерді қараумен қатар, тұтынушылардың құқықтарын қорғау талаптарының орындалуын бақылауды күшейтті. Жыл басынан бері 1 347 жоспардан тыс тексеру жүргізілді, бұл өткен жылмен салыстырғанда 42,2%-ға көп. Нәтижесінде 1 836 әкімшілік іс қозғалып, 54,3 млн теңге айыппұл салынды.

Дереккөз: gov.kz