Түркістанда қаза тапқан екі батырға арналған деректі фильмдер таныстырылды
Түркістан қаласында ел қауіпсіздігін қорғау жолында ерлікпен қаза тапқан сарбаз Досбол Сапар мен полиция лейтенанты Мейрамбек Рахматуллаев туралы деректі фильмдердің таныстырылымы өтті.
Деректі фильмдердің таныстырылымы
Іс-шараға Түркістан облысы полиция департаменті бастығының орынбасары Ғалымжан Қуашбаев, облыс әкімінің орынбасары Ертай Алтаев, ҰҚК департаменті басшысының бірінші орынбасары Талғат Мелдешов, Ұлттық ұланның 5574 әскери бөлімі командирінің орынбасары Алишер Тұрсынбаев және қаза тапқан қызметкерлердің туыстары қатысты.
Таныстырылымда Ақтөбе қаласындағы террористік акт кезінде қаза тапқан Досбол Сапар туралы «Тағдырды талқандаған терроризм» және Алматыдағы лаңкестік оқиғада ерлікпен көз жұмған Мейрамбек Рахматуллаевқа арналған «Қаралы күннің қаһарманы» атты деректі фильмдер көрсетілді.
Фильмдердің мазмұны және шара мақсаты
Фильмдерде терроризмнің адам өміріне әкелетін зардаптары, ел тыныштығы үшін жанын қиған азаматтардың батылдығы мен олардың жақындарының қайғысы суреттелген. Іс-шара барысында Ғалымжан Қуашбаев қос батырдың ерлігіне тоқталып, олардың қысқа ғұмырында өшпес із қалдырғанын атап өтті.
Қаза болған батырлардың ата-аналары естеліктерімен бөлісіп, ұлдарының өмір жолы мен азаматтық тұлғалары туралы айтты. Бұл естеліктер жиналғандарға ерекше әсер етті.
Жас ұрпаққа тәрбие және терроризмнің алдын алу
Кездесудің басты мақсаты – екі батырдың есімін ұлықтау, ерлігін жастарға үлгі ету және экстремизм мен терроризмге қарсы күрестің маңыздылығын көрсету.
Дереккөз: gov.kz
