Ақтөбеде қағаз бен картон зауыты салынып жатыр: жоба құны 10,3 млрд теңге

Ақтөбеде макулатураны қайта өңдеп, қағаз бен картон шығаратын жаңа зауыттың құрылысы жүріп жатыр. Жобаны «CAPITAL PLAST KZ» ЖШС іске асыруда, оны ҚР Экология және табиғи ресурстар министрлігінің қолдауымен «Жасыл даму» АҚ қаржыландырады.

Зауыт қанша өнім шығарады

Кәсіпорын жобалық қуатына шыққанда, жылына мынадай көлемде өнім өндіреді:

• гофрлауға арналған қағаз — 18 мың тоннаға дейін;
• тегіс қабаттарға арналған картон — 24 мың тоннаға дейін.

Зауыт қайталама шикізатты пайдаланады. Бұл Ақтөбеде жаңа өндірістік қуат қалыптастырып қана қоймай, макулатураны қайта өңдеуге тарту көлемін арттыруға мүмкіндік береді.

Құрылыс қай кезеңде тұр және зауыт қашан ашылады

Құрылыс жұмыстары жоспарға сәйкес жүріп жатыр. Алаңда іргетас құю, қойма салу және қадаларды орнату жұмыстары жалғасуда. Қазандық салынып бітті.

Кәсіпорынды 2027 жылы пайдалануға беру жоспарланған. Зауыт толық қуатына шыққан соң 300-ден астам жұмыс орны ашылады.

Жобаны кім қаржыландырады

Жобаның жалпы құны шамамен 10,3 млрд теңгені құрайды. «Жасыл даму» АҚ оған кәдеге жарату төлемдері қаражатын бағыттады.

Қор осы төлемдер есебінен жалпы сомасы шамамен 116 млрд теңге болатын 30 жобаны қаржыландырды. Қазақстан Республикасының Экологиялық кодексіне сәйкес мұндай жобалар қалдықтарды басқарудың заманауи инфрақұрылымын дамытуға, қайта өңдеу көлемін арттыруға және қалдықтарды көму көлемін азайтуға бағытталған. Сонымен қатар олар қайталама шикізатты экономикалық айналымға тартуға ықпал етеді.

Дереккөз: gov.kz