Кибералаяқтық: ШҚО студенттеріне интернеттегі қауіптен сақтану жолдары түсіндірілді
Д. Серікбаев атындағы Шығыс Қазақстан техникалық университетінде бірінші курс студенттерімен профилактикалық кездесу өтті. Шараға 80-ге жуық студент қатысып, кибералаяқтық пен интернеттегі қауіптер және желіде сақ болу жолдары талқыланды.
Студенттермен кім кездесті және не талқыланды
Жастармен ШҚО ПД аға жедел уәкілі Нұрай Арыстанбек кездесті. Ол студенттерге интернет-алаяқтықтың кең таралған тәсілдерін таныстырды.
Кездесу еркін пікір алмасу форматында өтті. Студенттер өздерін қызықтырған сұрақтарын қойып, желідегі түрлі жағдайларға қатысты түсініктеме алды.
Дропперлік пен активаторлар студенттерге қандай қауіп төндіреді
Полиция өкілі жастар жиі тап болатын қылмыстық схемаларға тоқталып, дропперлік және «активаторлар» туралы айтты. Мұндай жағдайда жастар өз банк карталары мен шоттарын заңсыз операцияларға пайдалануға келісіп, қылмыстық іске араласып кетуі мүмкін.
Оңай ақша табуға уәде беретін ұсыныстың соңы жауапкершілікке әкелуі мүмкін екені де ерекше атап өтілді.
Интернет-алаяқтардан сақтану үшін не істеу керек
Студенттерге кибералаяқтардың құрбаны болмау үшін мынадай ережелерді сақтау қажеттігі түсіндірілді:
- күмәнді ұсыныстарды ажырата білу;
- белгісіз сілтемелерге өтпеу;
- бейтаныс адамдардың сөзіне бірден сенбеу;
- интернеттегі кез келген ақпаратты тексеру.
Сонымен қатар жеке ақпарат пен қаражатты қорғауға көмектесетін қарапайым қауіпсіздік ережелері еске салынды.
Полиция жастарға қандай кеңес береді
Полиция жастарды интернетте қырағы болуға, күмәнді ұсыныстарға сенбеуге шақырады. Кез келген әрекетке барар алдында ақпаратты тексеру қажет.
Дереккөз: gov.kz
