Теміржол арқылы астық тасымалдау 9 айда 12%-ға өсіп, 10,8 млн тоннаға жетті
2026 жылдың қаңтар–қыркүйек айларында Қазақстанның теміржол желісімен 10,8 млн тонна астық тасымалданды. Өткен жылдың осы кезеңінде бұл көрсеткіш 9,61 млн тонна болған, яғни өсім 12% құрады. Соның ішінде экспортқа жөнелтілген астық көлемі 14%-ға артып, 8,4 млн тоннаға жетті.
Орталық Азия елдеріне қанша астық жөнелтілді
Ең айқын өсім Орталық Азия бағытында байқалады. Тоғыз айда бұл елдерге теміржолмен 5,5 млн тонна астық жеткізілді, бұл 2025 жылғы сәйкес кезеңнен 33%-ға көп.
Негізгі көлем екі елге тиесілі:
- Өзбекстанға – 4,11 млн тонна (+44%);
- Тәжікстанға – 1,18 млн тонна (+16%);
- Қырғызстанға – 184 мың тонна;
- Түрікменстанға – 30 мың тонна.
Қытай мен Ауғанстанға тасымал қалай өсті
Басқа экспорттық бағыттарда да тасымал артты. Қытайға 750 мың тонна астық жөнелтілді, бұл өткен жылғыдан 54%-ға көп.
Ауғанстанға 762 мың тонна тасымалданды. Бұл 2025 жылдың сәйкес кезеңімен салыстырғанда 4,3 есе жоғары.
Қыркүйекте астық тиеу рекордтық деңгейге жетті
Жаңа егін жинау маусымы басталғалы астық тиеу көлемі өсіп келеді. 2026 жылғы қыркүйекте тиелген астық 1,45 млн тоннаны құрап, рекордтық көрсеткішке жетті. Өткен жылдың сәйкес айымен салыстырғанда өсім 7% болды.
Астық штабы қандай міндет атқарады
Жаңа өнімді тұрақты әрі уақтылы тасымалдау үшін Қазақстан Республикасы Көлік министрлігі астықты теміржолмен тасымалдауды ұйымдастыру және үйлестіру жөніндегі Астық штабын құрды.
Штаб тасымалға қатысатын барлық тараптың жұмысын үйлестіреді. Сондай-ақ теміржол инфрақұрылымы мен жылжымалы құрамның дайындығын бақылайды және туындаған мәселелерді жедел шешу үшін қажетті шараларды қабылдайды.
Астық тасымалына жылжымалы құрам жете ме
Жаңа өнімді тасымалдауға қажетті жылжымалы құрам дайындалды. Қазір қолда бар техника:
- 16,9 мың астық тасығыш вагон;
- 17,8 мың жабық вагон;
- 2 мыңнан астам локомотив.
Бұл көлем астықты толық мөлшерде тасымалдауға жеткілікті. Қажет болса, тасымалды ұлғайту үшін қосымша мүмкіндіктер қарастырылған.
Дереккөз: gov.kz
