АҚШ-та мұғалімдер Трампты сотқа берді

АҚШ-тың мұғалімдер одақтары мен Өзге нәсілдердің прогресіне жәрдемдесу ұлттық қауымдастығы (NAACP) АҚШ президенті Дональд Трамп әкімшілігін сотқа берді, деп хабарлайды AstanaNews.kz сайты inbusiness.kz-ке сілтеме жасап.

Тек наурыз айында білім министрлігінің 1,3 мыңнан астам адам қызметкері жұмыстан босатылған. Сондай-ақ, мұғалімдерді оқыту және зерттеу жұмыстарына 1,5 миллиард доллардан астам келісімшарттар мен гранттар алынып тасталған.

The New York Times басылымының жазуынша, сотқа жүгінуге биліктің АҚШ-тың Білім министрлігін жабу туралы шешімі себеп болған.

“Трамп әкімшілігі бұл өмірлік маңызды агенттікті жабу ниетін бірнеше рет мәлімдеген, соңғы рет 2025 жылғы 20 наурыздағы жарлықта атап көрсетілді”, – делінген сотқа ұсынылған шағымда.

Басылымның мәліметінше, екі арыз түскен: бірін Ұлттық білім беру қауымдастығы (NEA) мен NAACP Мэриленд штатының сотына берсе, екіншісін Америкалық мұғалімдер федерациясы (AFT) Массачусетс федералды сотына тапсырған.