Ан-26 ұшағы Ұлттық ұланда 44 жыл қызмет етіп, зейнетке шықты
ҚР ІІМ Ұлттық ұланы авиациясында ұзақ жыл пайдаланылған Ан-26 әскери-тасымал ұшағы қызметін аяқтады. Қазақстандағы осы типтегі соңғы әскери ұшақ соңғы рет аспанға көтерілді.
Ан-26 ұшағының қызмет тарихы 1981 жылы басталды
Ұшақ 1981 жылы Киев авиациялық зауытында шығарылған. Алғашқы 10 жылда ол КСРО Мемлекеттік қауіпсіздік комитетінің Шекара әскерлері авиациясы құрамында қызмет етті.
Ұшақтың негізгі базасы Қазақ КСР аумағында болды. Ол оңтүстік шекараны күзетумен байланысты тапсырмаларды орындады, әскери қызметшілер мен жүктерді тасымалдады.
1992 жылдан бастап Ан-26 Ұлттық ұлан авиациясында қызмет жалғастырды. Мұнда да ол әскери қызметшілер мен жүктерді тасып, өзге де қызметтік міндеттерді атқарды.
Ұлттық ұлан авиациясында Ан-26 неше сағат ұшты
Әуе кемесі қызметтік рейстерді орындауға үнемі дайын болды. Ол заманауи талаптарға сай жаңғыртылып, ИКАО стандарттарына сәйкестендірілді. Соның арқасында ұшақ Қазақстан аумағымен қатар жақын шетел мемлекеттеріне де ұша алды.
- Ұлттық ұлан авиациясындағы ұшу уақыты – 8400 сағат.
- Ұшақтың жалпы қызмет жолы – 44 жыл.
Соңғы рейс: экипаж ұшақпен қоштасты
Соңғы рейс ұшақты ұзақ жыл басқарған экипаж үшін де ерекше болды. 3656 әскери бөлімінің ұшқышы Медет Сейтов осы түрдегі ұшақты 15 жылдан бері басқарады. Ол – экипаждағы Ан-26-ның соңғы ұшқыш-нұсқаушысы.
Соңғы ұшудан кейін экипаж мүшелері ұзақ жыл бірге қызмет еткен әуе кемесімен қимай қоштасты.
Ан-26-ның пайдаланудан шығарылуымен Қазақстан әскери авиациясындағы осы типтегі ұшақтардың қызмет тарихы аяқталды. Әскери-тасымал ұшағы енді жауынгерлік қызмет атқармайды.
Дереккөз: gov.kz
